Gertakari arrazista, xenofobo, antigitano edota LGTBIfobikoen aurrean jarduteko Eibarko Udalaren Protokoloa
Biltzen-Integraziorako eta Kultura arteko Bizikidetzarako Euskal Zerbitzuarekin lankidetzan egindako dokumentu honekin, Eibar lehen udalerria da Euskadin, halako tresna espezifiko bat duena, gorrotozko gertakarien aurrean erantzun instituzional eta sozial bat koordinatzeko. Ekimena urtebetetik gorako lanaren emaitza da, eta, erasoetan esku hartzeaz gain, jokabide horiek ikusarazi eta prebenitu nahi ditu, ikuspegi integrala eskainiz giza eskubideen eta gizarte-kohesioaren alde.
Protokoloak begirada hirukoitz bat eskaintzen du, migratzaileen, ijitoen eta LGTBIren errealitateak barne hartzen dituena, eta gorroto-delituei aurre egin eta biktimak babesteko gero eta handiago den eskabide sozial bati erantzuten dio. Dokumentu honek, gainera, funtsezko kontzeptuak jasotzen ditu gorroto-delituak ulertzeko eta aitortzeko, eta zehaztu egiten du zein diren egoera bakoitzean jarraitu beharreko prozedurak eta esku-hartze azkarreko mekanismoak, arreta berezia jarriz sare sozialen eta beste espazio digital batzuen erabileran, non intzidente horiek ugaritzen ari diren.
Azken urte honetan, Biltzen zerbitzuak Eibarko Udalarekin jardun du lanean, tratu-berdintasunaren eta diskriminazio ezaren arloei buruzko prestakuntza emanez herriko eragileei eta Udaleko teknikariei, besteak beste. Trebakuntza hori ikuspegi prebentibo eta proaktibo baten parte da, bideratuta dagoena erantzun instituzionala hobetzera eta gizartea diskriminaziorik ezaren garrantziaz sentsibilizatzera. Protokolo honek gorroto-istiluen aurkako esku-hartzea errazteaz gain, ahalbidetu egiten du halako delitu motei buruzko tokiko zifrak ikusaraztea, patroiak identifikatzen eta herriko problematika dimentsionatzen lagunduz.
Eibarko Udalarentzat protokoloa tresna "bizi” bat da, alegia, etengabe berrikusi eta eguneratuko da, eta komunitateko eragile instituzionalekin eta sozialekin partekatuko da esperientzia. Hala, helburua da dokumentua lerrokatuta egotea errealitate sozialarekin eta kolektibo zaurgarrien eskabideekin.
Protokoloa urriko Osoko Bilkuran onartu ondoren, Udalak iragarri du laster jendaurreko aurkezpen bat antolatuko dela, eta, bertan, dokumentuan jasotako jarduketa-prozedurak eta neurriak zehaztuko direla. Dibulgazio-ekitaldi honen xedea da herritarrak informatzea eta sentsibilizazio handiagoa sustatzea, udalerriak diskriminazioaren eta gorrotoaren forma guztiak borrokatzeko duen konpromisoari buruz. Gainera, Udalak asmoa du kanpoko eragileentzako eta teknikarientzako prestakuntza-saioekin jarraitzeko, protokoloa bizitza publikoaren eremu guztietan modu eraginkorrean ezartzen dela ziurtatzeko.
Ekimen honen bidez, Eibarrek giza eskubideen defentsarekin duen konpromisoa berresteaz gain, mezu argi bat ere helarazi nahi du edozein diskriminazio mota arbuiatzeko eta biztanle guztientzako ingurune segurua eta errespetuzkoa sustatzeko. Neurri honek Eibar erreferente bihurtzen du Euskadiko eskubideen eta bizikidetzaren babesean, eta, era berean, gizarte inklusibo eta ekitatibo bateranzko bidea erakusten du.