Eibar, "Haurren Lagun den Hiria" aitortzaren hautagai
Eibarko Udalak lanean dihardu "Haurren Laguna den Hiria" aitorpena lortzeko xedez. Unicefek emandako zigilu horrek haurren eta nerabeen eskubideak aktiboki sustatzen dituzten udalerriak saritzen ditu.
Prozesuaren lehen urratsa UNICEFekin sinatutako hitzarmena2024ko irailaren 30eko udalbatzarrean aho batez onartzea izan zen. Hitzarmen horrek ezartzen ditu zeintzuk diren aitortza lortzeko beharrezkoak diren konpromisoak, helburuak eta epeak. Hitzarmenaren helburua hauxe da: Udalaren politikek eta ekintzek Eibarko neska-mutikoen beharrak, eskubideak eta parte-hartze aktiboa kontuan hartzea.
Ahalegin horren barruan sartzen dira Haurren Tokiko Plana egitea, adingabeek duten egoerari buruzko diagnostikoa, egitea eta haurrek eta nerabeek parte hartzeko organo bat eratzea.
Sailen arteko mahai tekniko-politikoa
Baldintzak betetzeko, Udalak sailen arteko mahai tekniko-politiko bat osatu zuen, hilero bildu dena, haurren beharrei ikuspegi posible guztietatik heltzeko.
Haurreriaren diagnostiko integrala
Gainera, Eibarko haurreriaren diagnostiko integral bat egin zen. Azterketa horretan, zuzenean hartu zuten parte haurrek, bai eta haien ongizatearekin zerikusia duten eragile eta udal-erakundeek ere.
Azterlanean, 10-18 urte arteko 900 adingabe inguruk hartu dute parte herriko ikastetxeetan egindako inkesten bidez, eta, horri esker, Eibarko haur eta gazteen kezka eta premia nagusiak identifikatu dira funtsezko arloetan, hala nola demografian, familian, osasunean, hezkuntzan, aisialdian eta hirigintzan.
Diagnostiko horretatik abiatuta, Udalak 16 erronka nagusi identifikatu zituen, besteak beste, kontziliazio familiarra hobetzea, ohitura osasungarriak sustatzea, arrisku-jokaerak prebenitzea eta aisialdi inklusiboko gune gehiago egitea.
Haurren eta Nerabeen Kontseilua.
Haurren eta Nerabeen Kontseilua sortzea
Proiektuaren beste funtsezko ekintzetako bat Haurren Kontseilua sortzea izan zen. Kontseilua haurren partaidetzarako organo bat da, gazteenei beren iritziak adierazteko eta eragiten dieten erabakietan laguntzeko aukera ematen diena.
Kontseiluko ordezkariak aukeratzeko prozesua honako hau izan zen: ikastetxe bakoitzak bi haur izendatu zituen, eta Eibarko Haur eta Nerabeen Kontseiluaren lehen topaketa 2025eko otsailaren 17an egin zen, Eibarko Udaleko Osoko Bilkuren Aretoan. Guztira, udalerriko hainbat ikastetxetako 26 haurrek osatzen dute Kontseilua.
Haurren eta Nerabeen 1. Tokiko Plana onartzea
Aurretik egindako lanari jarraipena emateko, 2025eko maiatzaren 26an, Udalbatzak Haurren eta Nerabeen I. Tokiko Plana (HNTP) onartu zuen. Dokumentuak helburu argia du: haurren eta nerabeen eskubideak udal-politiketan modu eraginkorrean eta zeharkakoan integratzea, haurrak eta nerabeak eskubide osoko subjektu gisa aitortuz.
Dokumentua 6 helburu estrategikoren eta 16 jarduera-ildoren inguruan egituratzen da, eta 8,2 milioi euroko inbertsioa aurreikusten da datozen lau urteetan.
Plan hau onartuta, Eibarrek Haurren Lagun den Hiria zigilua lortzeko hautagaitza aurkeztu du. Zigilua UNICEFek sustatutako aitorpen bat da, eta Haurren Eskubideei buruzko Konbentzioaren tokiko aplikazioarekin konprometitutako udalerriak bereizten ditu.
Haurren Lagun den Hiria aitortza ez da bereizgarri bat soilik, baizik eta aukera bat Eibarrek belaunaldi gazteenekin duen konpromisoa sendotzeko, haien ahotsak entzungo direla eta haien eskubideak errespetatuko direla bermatuz.
Proiektu honekin, Udalak gizarte inklusiboago eta parte-hartzaileago baten aldeko apustua indartzen du.
