Dantza energetikoa: mugimendua, gorputz-konexioa eta adierazpen emozionala (2026-01)
Dantza energetikoak barneko emozioekiko lotura erraztu nahi du, musikaren, mugimenduaren, kontaktuaren eta energiaren bidez; integrazio afektiboa eta adierazpen emozionala sustatu nahi du, koreografiarik eta aurreiritzirik gabe mugitzeko askatasunetik abiatuta eta unean sentitzen dena soilik gidatzat hartuta. Esperientzia honek barnera begiratzera gonbidatzen gaitu gure gorputzarekin konektatzeko, pentsamendu kontzeptuala eta kanpoko elkarrizketa alde batera utzita.
Helburuak: musikaren, mugimenduaren, kontaktuaren eta taldearen energiaren bidez barne-emozioekiko konexioa erraztea, mugitzeko askatasuna ahalbidetzea eta lotsak eta genero-aginduak gainditzea.
Edukiak: biodantzaren eta Ecstatic Dance-aren printzipioak, meditazioa eta mugimendua, lan emozionala eta gorputzarekiko konexioa.
Organo tramitatzailea: Eibarko Udaleko Berdintasun Zerbitzua, Emakumearen Mahaiaren lankidetzaz.
Nork emango duen: Zahira Montalvo eta Elba Ruiz (Kancaneo teatro)
Hartzaileak: interesa duten 18 urtetik gorako emakume guztiak.
Non eta noiz: Andretxea. 2026ko maiatzak 15 eta 16.
Ordutegia: maiatzaren 15ean 17:00etatik 20:00etara eta maiatzaren 16an 10:00etatik 14:00etara eta 16:00etatik 19:00etara.
Ikastarora ekarri behar den materiala: Ez dute materialik ekarri behar.
Ikastaroaren prezioa:
18,43 €
Ikastaroaren ordainketa: matrikula ordainketa bakar batean kobratuko da, ordainagiria helbideratuta.
Ikasle kopurua: gutxienez 8, eta gehienez 14.
Ikastaroaren hizkuntza: gaztelania
Aurrematrikula: ikastaroan izena emateko aurrematrikula egin beharko da 2026ko otsailaren 2tik 24ra (biak barne). Aurrematrikula egiteko formulario bat bete beharko da elektronikoki esteka honetan:
https://formularioak.eibar.eus/eu/dantzaenergetikoa2026-01
Kudeaketa-arauak:
Matrikularako izena eman duten pertsonen kopurua ez bada heltzen ikastaroa emateko ezarritako gutxienekora, ez da ikastarorik egingo. Abisua udalaren web-orrian emango da (www.eibar.eus) otsailaren 26an.
Matrikularako izena eman dutenen kopuruak ezarritako gutxieneko ikasle-kopurua gainditzen badu eta ezarritako gehieneko ikasle-kopurutik gorakoa ez bada, matrikula guztiak onartuko dira. Onartu diren pertsonen izenekin zerrenda bat egingo da, PEGORAn eta udalaren webgunean (www.eibar.eus) egongo dena otsailaren 26tik aurrera.
Matrikularako izena eman dutenen kopurua ezarritako gehieneko ikasle-kopurutik gorakoa bada, ikasleen aukeraketa zozketa bidez egingo da. Zozketa Gizartekintzan (Berdintasun Zerbitzua) egingo da, otsailaren 26an, 09:00etan. Era honetan egingo da:
- Zozketa egin aurretik ikastaroan izena eman duten pertsona guztien zerrenda bat egingo da alfabetoaren arabera ordenatuta; bakoitzari zenbaki bat emango zaio.
- Zaku baten sartuko dira zenbaki guztiak eta zenbaki bakar bat aterako da.
- Aukeratutako pertsonak zenbaki horretatik aurrerako zenbakiak dituztenak izango dira, ikastaroa emateko dauden leku guztiak bete arte.
Onartutakoen izenekin zerrenda bat egingo da, PEGORAn eta udalaren webgunean (www.eibar.eus) egongo dena otsailaren 26tik aurrera.
Onartutakoen zerrenda argitara ematen den unean sortzen da matrikularen zenbatekoa ordaintzeko obligazioa. Ikastaroa utzi edo baja ematen duen pertsonak ez du izango matrikularen zati proportzionala jasotzeko eskubiderik.
Oharrak:
Aurrematrikularen onarpenaren abisua jaso ondoren, behin betiko izen-ematea egin behar da, dokumentazio hau aurkeztuz ikastaroaren lehen egunean:
- Dantza energetikoa: mugimendua, gorputz-konexioa eta adierazpen emozionala tailerrean izena emateko inprimakia, behar bezala beteta, eta sinatuta.
Informazio gehiago: 943 54 39 38 telefonoan.
Ikastaroaren FITXA