Espetxealdi iraunkor berrikusgarria ezarri diote Raquel Lopez eibartarraren eta haren semearen hilketa bikoitzaren akusatuari
Hildakoen senideak eta Miguel de los Toyos alkatea.
Akusatua bi kasuetan senidetasun astungarri batekin egindako hilketa bikoitzagatik zigortu dute. Raquelen kasuan, 25 urteko kartzela-zigorra eta erabateko desgaikuntza ezartzen zaizkio, eta, semeari dagokionez, espetxealdi iraunkor berrikusgarria eta erabateko desgaikuntza, kondenak irauten duen bitartean.
Eibarko Udalak Raquel Lopez Airas eta bere semearen kasuaren epaiaren berri eman du asteazken honetan, azaroaren 6an. Biak 2017ko maiatzaren 2an hil zituzten, Alcobendasen (Madril). Prentsaurrekoan bildu dira Miguel de los Toyos Eibarko alkatea, hildakoen senideak eta Marisa Soroa abokatua.
Madrilgo Probintzia Auzitegiko epai judizialaren arabera, akusatua "Raquel Lopez Airas eta haren seme Markel hiltzeagatik zigortu dute, senidetasun-astungarriaren erantzukizun kriminala leporatuta, bi kasuetan".
Raquelen kasuan, "25 urteko kartzela-zigorra eta erabateko desgaikuntza ezarri diote genero arrazoiengatik kondenak irauten duen bitartean". Adingabeari dagokionez, "espetxealdi iraunkor berrikusgarria eta erabateko desgaikuntza" ezarri diote.
Miguel de los Toyos alkatearen hitzetan, "prozesu judizialean, Udaletik lagundu dugu familia akusazio partikular gisa egon zedin prozeduran". Era berean, "auzi honetan justizia egiteko egindako ahaleginaren emaitza helarazi nahi diegu herritarrei", gaineratu du.
Bestalde, Marisa Soroa abokatuak nabarmendu duenez, "epaia ondo landuta dago, eta senidetasun aringarria aplikatzen diote bi hilketetan. Raquelen hilketari dagokionez, gainera, azpikeria eta ankerkeria gertatu ziren. Akusatuari zigorrik altuena ezarri diote, baina helegitea jarri behar diote", gogoratu du.
Hildakoen senideek eskerrak eman dizkiete prozesu judizial osoan zehar parte hartu duten laguntzaileei.
Eibarko Udalaz gain, Madrilgo Erkidegoak, Estatuko Abokatutzak, Ministerio Fiskalak eta Gobernu zentralaren ordezkaritza batek ere parte hartu dute akusazio partikular gisa.
Aurrekariak
Ezbeharra gertatu zenean, Eibarko Udalak Rakel López Airas eta bere semearen hilketa erabat gaitzetsi zuen. Tamalez, genero indarkeria egoera baten biktima ziren. Halaber, Udalak eibartarrei dei egin zien elkarretaratze bat egiteko, hilketak gaitzesteko.
Gainera, bi dolu-egun izendatu ziren, eta udaletxeko banderak makila erdian egon ziren.
Udalak erabateko elkartasuna adierazi zion uneoro Rakel López Airas eta bere semearen familiari. Udala guztiz prest egon da izan zitzaketen premiak asetzen laguntzeko, eta auzibidean akusazio partikular gisa azaltzeko.