Edukira salto egin | Salto egin nabigazioara

Udalbatzak 2023rako Ordenantza Fiskalak eta Prezio Publikoak onartu ditu

2022ko urriaren 13ko ezohiko Osoko Bilkuraren irudia.

2022ko urriaren 13ko ezohiko Osoko Bilkuraren irudia.

2022/10/13

PSE-EEk aldeko botoa (9) eman du eta Eibarko EAJ-PNV (3) eta EH-Bildu (4) abstenitu egin dira. Bestalde, Elkarrekin Podemosek aurka bozkatu du (1).

Gaur goizean egindako ezohiko Udalbatzak 2023rako Ordenantza Fiskalak eta Prezio Publikoak onartu ditu. Horrela, hamargarren urtez jarraian, datorren urterako tasak eta zergak izoztea onartu da.

Udal taldeen arteko eztabaida luze baten ondoren, akordioak PSE-EEren aldeko 9 boto eta Eibarko EAJ-PNVren (3) eta EH-Bilduren (4) abstentzioak izan ditu. Elkarrekin Podemoseko zinegotzi bakarrak, berriz, aurka bozkatu du.
 
Jon Iraola alkatearen hitzetan, "Proposatu dut zergak ez igotzea, eta erantzukizunez jokatzea egungo egoera ekonomikoaren aurrean, Eibarko herritarrak eta sektore ekonomikoak jada nabarmen jasaten ari baitira prezioen igoeraren ondorioak; eibartarren eros-ahalmenean eta haien negozioen kostu finkoetan eragina izaten ari den igoera. Udal-zergak ez igotzearen helburua inflazioa ez jasanaraztea da, nahiz eta Udala ere nabaritzen ari den haren eragina. Horrek behartzen gaitu eskuragarri ditugun baliabideak eraginkortasun handiagoarekin gestionatzera, eta seguru nago kapaz izango garela".

2023rako onartutako aldaketak, ordenantza fiskalei eta prezio publikoei dagokienez, askotarikoak dira. Alde batetik, bizitegi-sektorean eta sektore tertziarioan efizientzia energetikoa eta energia berriztagarriak ezartzeko xedearekin, Eraikuntza, Instalazio eta Obren gaineko Zergan, % 95eko hobaria aplikatzekoak diren energia berriztagarri motak zabalduko dira, eta ez dira mugatuko eguzki-energiara  —indarreko Ordenantzan jasota zegoen bezala—, baizik eta gainerako energia berriztagarriei ere aplikatzea..
 

Ekonomia Jardueren gaineko Zergari dagokionez,  kuotaren % 50erainoko hobaria sartzen da udal-kuotagatik zergak ordaintzen dituzten subjektu pasiboentzat,  baldin eta energia berriztagarriak edo kogenerazio-sistemak aprobetxatzeko instalazioetatik energia erabiltzen edo ekoizten badute.

Azkenik, Ondasun Higiezinen gaineko Zergan, % 50eko hobaria aplikatzekoak diren energia berriztagarri motak zabalduko dira eta ez da mugatuko eguzki-energiara —dagoeneko indarreko Ordenantzan jasota baitago—, baizik eta gainerako energia berriztagarriei ere aplikatzea.

Bestalde, bide publikoa mahai eta aulkiekin, salgai dauden produktuekin edo bestelako elementu osagarriekin erabiltzeari eta okupatzeari buruzko udal-ordenantzan aldaketak egingo dira. Horren prezioa terraza egonkorren prezioarekin parekatzen da, eta ulertzen da “terraza egonkorren kasuan bezala, espazioa kolonizatzen dela, eta, horregatik, moduluaren prezioak egunero muntatzen eta desmuntatzen diren terrazen prezioa baino handiagoa izan behar duela”, adierazi du Telleriak. Gainera, aldaketa bat egingo da, terrazak okupatzeko aldia amaitu aurretik alta- eta baja-kasuetan eska daitezkeen zenbatekoak nola kalkulatu argitzeko, eta, horrela, proportzionaltasunaren eta segurtasun juridikoaren printzipioa betetzeko.

Gainera, 2022ko uztaileko osoko bilkuran onartu zen % 100eko hobariak ematea (edo, bestela esanda, ordainketatik salbuestea) ostalariek bide publikoa  urtarrilaren 1etik martxoaren 15era bitartean okupatzeagatik ordaindu beharko zuketen tasa, alegia, ostalaritzako establezimenduek Covid-19a dela-eta izan zituzten murrizketa handieneko epean.

Halaber, zerbitzuak emateagatik edo udal-jarduerak egiteagatik ordaindu beharreko Prezio Publikoak arautzen dituen Ordenantza aldatuko da. Alde batetik, Ordenantzaren edukiera handiko ekipamenduetako ikuskizunen atala (Kiroldegia eta Astelena frontoia) aldatuko da, non Errebal Plazia sartuko den, eta, bestetik, lokal soziokulturalak alokatzeko aukera emango duen atal berri bat sartuko da, “Errebalgo gelak” epigrafearekin.   

Portaleko gelekin gertatzen den bezala, tasa hau ordaintzetik salbuetsita egongo dira Udal Intereseko Elkarteen Erregistroan inskribatutako irabazi asmorik gabeko elkarte eta erakundeak eta onura publikokotzat jotakoak.

Aldaketa horiei buruzko xehetasun gehiago jaso nahi dutenek 2023rako Ordenantza Fiskalak eta Prezio Publikoak onartzeko dokumentua kontsulta dezakete.

 

2022ko urriaren 13ko ezohiko Osoko Bilkura