Udalak Gizarte-Larrialdietarako Laguntzen 619 eskaera onartu ditu 2020ko ekitaldian
Portalea, Gizartekintza Saila dagoen tokia. Artxiboko irudia.
Laguntza hauek eskatzeko epea amaituta, aurreko urtean baino eskaera gutxiago jaso dira eta 550.000 euro baino gehiago inbertitu dira, eta Gizarte Zerbitzuen Sailak 18.000 euro inguru jarri ditu. Batez ere, etxebizitza alokatzeko eta mantentze- eta energia-gastuetarako eskaerei erantzun zaie.
Eibarko Udaleko Gizarte Zerbitzuen Sailak Gizarte Larrialdietarako Laguntzen (GLL) 619 eskaera onartu ditu 2020ko ekitaldian, aurreko urtean baino zertxobait gutxiago, joan zen urtean 672 eskaera jaso baitziren. Guztira, 554.023,51 euroko inbertsioa egin da.
Idoya Sarasqueta Gizarte Zerbitzuetako zinegotziaren hitzetan, “aurten, Eusko Jaurlaritzako Gizarte Politikako Sailaren aldetik diru gehiago jaso izan dugu, aurtengo eskaerei erantzuteko behar den guztizko zenbatekoaren % 97 inguru hark bete baitu. Horri esker, Udalak 18.000 euro inguru eman behar izan ditu, aurreko urteetan eman behar izan genuena baino askoz gutxiago, ekitaldi bakoitzean 80.000 euro baino gehiago jarri izan baititugu.”
Aurten onartu diren eskaera motei dagokienez, nabarmen igo dira etxebizitza alokatzeko laguntzak, 2019ko 91 laguntza haietatik 2020ko 145 kasuetara igaro baitira, eta 250.000 eurotik gorako zenbatekoa izan dute, batez ere, COVID-19aren ondorioz.
Halaber, mantentze- eta energia-gastuetarako eskaera kopuru handi bati erantzun zaio, eta 215 eskaera onartu dira mantentze-lanetarako eta 208 eskaera energiari dagokionez. Horrek 210.000 euro baino gehiago eskatu ditu kontzeptu horietarako laguntzetan. Eskaera horietako asko pentsiodunek eta alargunek eskatzen dituzte urtero, dauzkaten pentsioekin ezin dietelako aurre egin gastu horiei.
Bestalde, 38 laguntza eman dira etxebizitzaren mailegua ordaintzeko, 7.000 euro baino gehixeago. Horren atzetik, premia pertsonalak daude (normalean, odontologia- eta betaurreko-gastuak), 6.300 eurokoak, 10 eskabideri dagozkienak, eta, azkenik, 2.100 eurotik gorako bi eskaera eman dira, etxebizitza-maileguagatiko edo bestelako kontzeptuengatiko zorrengatik.
Gizarte Zerbitzuen Sailak 2019an emandako laguntzak
2019. urteari dagokionez, Memorian jasotzen den bezala, Gizarte Zerbitzuetako teknikariek 5.049 arreta eskaini zituzten, 2018koarekin alderatuz % 11 gehiago, eta % 26ko igoera izan da 2015etik aurrera. 2020ko daturik ez dagoenez, badirudi aurten ere gora egin duela.
Batez ere, GLLen eskaerei erantzun zitzaien, 2.428 arreta eskainiz Mendekotasun, laguntza tekniko eta telealarma egoerekin lotutako 1.000 eskaera inguru ere aztertu dira.
Ildo horretatik, 130 pertsona artatu zituen Etxeko Laguntza Zerbitzuak, eta 32.000 ordu baino gehiago eskaini zitzaizkien. Zaintzaile bat kontratatzeko mendekotasun-prestazioei dagokienez, 120 emakumek eta 82 gizonek eskatu zituzten.
Bestalde, 2019an, Gizarte Zerbitzuetako sailak zuzenean edo zeharka Arragueta kaleko 15., 16., 17. eta 19. zenbakietan bizi ziren 50 pertsona inguru artatu behar izan zituen, urte hartako azaroan beren etxeetatik atera beharra izan zutenak.