Eibarrek segurtasun-datuak hobetu eta prebentzioa sendotu du

Azken uda honek datu onak utzi ditu udalerriko kriminalitateari begira. Eibarrek bilakaera positiboa izan du adierazle gehienetan, batez ere enpresetan eta etxe partikularretan egindako lapurretetan, non datuak iazkoak baino nabarmen hobeak diren, Udaltzaingoaren eta Ertzaintzaren arteko koordinazioaren ondorioz.   

Jon Iraola alkateak oso positibotzat jo ditu Ertzainak Herritaren Segurtasunaren Foroan emandako datuak, eta azpimarratu du "prebentzio-lanak, poliziaren koordinazioak eta herritarren lankidetzak emaitza nabarmenak" izaten ari direla, eta egoera hobetzen ari dela.  Eibar bertakoekin duen konpromisoa betetzen duen herri segurua da, eta horrelako izaten jarraituko du.”

Trafiko eta Mugikortasun zinegotzi Alberto de la Hozek —Herritarren Segurtasunaren Foroko kide— azpimarratu duenez, “norabide zuzenean ari gara lanean.   Herritarren Segurtasunaren Foro berrian informazioa emankorra izaten ari da, eta  alde guztiak datoz bat diagnostikoarekin; Udalean apustu sendoa egiten ari gara poliziari tresnak emateko, beren lana egin dezaten.”  

Etxebizitzetan egindako lapurreten kasuei dagokienez, hauexek dira datuak: ekainean bi kasu, uztailean bat ere ez eta abuztuan bost. Horrek udalerria antzeko herrien batez bestekoaren azpitik jartzen du, eta 2024ko emaitzak hobetzen ditu.

Daturik positiboena Eibarko enpresetatik dator.  Ertzaintzak emandako datuen arabera, 2025eko udan ez da lapurretarik izan. Udalak poliziaren presentzia handiagoari, Udaltzaingoaren eta Ertzaintzaren koordinazio hobeari eta segurtasun-sistema aurreratuagoak erabiltzeari egotzi dio lorpen hori.

Aisialdiko lokaletan ere joera beheranzkoa da: lau lapurreta ekainean, lau uztailean eta bi bakarrik abuztuan.

Hala ere, oraindik ere erronkarik nagusiena trastelekuetako lapurretena da, azkenaldian deliturik ohikoena baita; izan ere, iazko datuekin alderatuta, nabarmen egin dute gora kopuruek.  Ildo horretatik, azpimarratu beharra dago gorabehera horietako gehienak oso lokalizatua dagoen pertsona talde txiki batek egiten dituela,  behin eta berriro, eta Udaltzaingoa eta Ertzaintza indarrak batzen ari direla horien aurka egiteko. Irailaren 22ra arte, Poliziak 44 kasu argitu ditu, eta horrek erakusten du ikerketa eraginkorra izan dela.

Horren harira, duela egun batzuk Ertzaintzak Eibarko Udalarekin lankidetzan Errebal plazan antolatutako ekimenean, polizia esku-hartzeetan eskuratutako objektu ugari jarri zituen jendaurrean, biktimek objektuak identifikatu eta berreskuratzeko.

 Ekimenak arrakasta handia izan du, gutxienez 15 objektu berreskuratzeko aukera eman baitie legezko jabeei.

Jon Iraola alkateak adierazi duenez, "azken hilabeteetako emaitza onek gure segurtasun-indarrekiko konfiantza indartzen dute eta prebentzioan eta teknologian inbertitzen jarraitzera bultzatzen gaituzte. Eibar aurrera egiten ari da segurtasun eredu parte-hartzaile, moderno eta eraginkorrago baterantz.

Gainera, Udalak iragarri du bide-segurtasuna eta hiri-zaintza indartzeko laster trafiko-kamerak jarriko dituela hiriko gune estrategikoetan, herriko sarrera eta irteeretan barne. Horrek ahalbidetuko du herri barruko bide-segurtasuna indartzea, eta, era berean, aukera emango du udalerrian sartzen diren ibilgailuak kontrolatzeko, herriko zaintza hobetu eta delituak prebenitze aldera. 

Aldi berean, auzozain berriak —hurbileko agenteak— datozen asteetan hasiko dira lanean, behin hautaketako barne-prozesua amaitu ondoren.

Herritarren eta Udaltzaingoaren arteko harremana estutzeko sortutako figura honek prebentzioa, hurbileko arreta eta auzoetako gorabeheren konponbide arina sustatzea du helburu. “Horrelako ekimenekin” azpimarratu du Iraolak, “urrats bat egiten dugu aurrera Eibar seguruagoa lortzeko bidean, herritarrentzat hurbilekoa eta irisgarria den polizia-eredu batekin, eta, aldi berean, profesionala.”.