Eibarko biztanleek 10.000 metro karratu gehiago irabaziko dituzte espazio publikoan, Estaziño-Azitain arteko trenbidea estalita

Eusko Jaurlaritzako Mugikortasun Jasangarriaren Sailak, Euskal Trenbide Sarearen bitartez, Eibarko eta Azitaingo geltokien artean trenbideak estaltzeko lanen azken txanpari ekingo dio. Horrela, 10.000 metro karratuko eremu publiko berria sortuko da herritarren aisialdirako. 1.000 metrotik gorako luzera eta batez beste 10 metroko zabalera duen trenbidearen gainean sortutako plataformara, eskaileretatik edo pasealekuan zehar egongo diren hiru igogailutatik iritsi ahal izango da.

Susana García Chueca Mugikortasun Jasangarriaren sailburuak eta Jon Iraola Eibarko alkateak estalkiaren zati bat bisitatu dute gaur goizean, Miguel Ángel Páez Azpiegituretako sailburuordearekin, Antonio López ETSko zuzendari nagusiarekin eta Pedro Escribano udalerriko Obra zinegotziarekin batera. Guztiek ere lanen egoera aurreratua egiaztatu ahal izan dute. 

Luzeran, estalkiak kilometro inguru izango du, eta  80 bat metro besterik ez dira falta osatzeko. Lehen zatia metalezko egitura batekin handitu den Eibarko geltokiaren ondoko pasabidean hasten da. Horren ondoan igogailu bat eraiki da. 

Estalkiaren lehen tartea trenbidearen geltokiaren paraleloan doana Matsaria kalearen gainetik, metalezko egitura baten gainean dago sostengatuta eta 134 metro luze da. Jarraian, 41 metroko plataformaren hurrengo segmentua horma baten gainean dago bermatuta. Ondoren, 957 metroko luzera duen metalezko beste egitura bat dator, N-634 saihesbidearen zubiraino, Azitaingo geltokia igaro eta pasealekua amaitzen den lekuraino. Ibilbide osoaren gainazalaren akabera hormigoi inprimatuz egina dago, eta argiekin eta paperontziekin osatuko da. 

Estaldura Next Generation EU funtsekin finantzatu da, Gobernu zentralaren Suspertze eta Erresilientzia Mekanismoaren bidez. Lanak egiteko, Mugikortasun Jasangarriaren Sailaren eta Eibarko Udalaren arteko hitzarmen egin da, trenbideak udalerrian duen hirigintza-integrazioaren adibide argi gisa. Izan ere, herrian antzeko ezaugarriak dituen hirugarren proiektua da hau. 2011. urtearen hasieran, Ardantzako geltokia eta trazaduraren zati bat estaltzeko lanak inauguratu ziren. Haren luzera 200 metro pasatxokoa zen, eta 2.258 metro karratuko azalera hartzen zuen. Lau urte geroago, Amaña Ardantza tartea ireki zen herritarrentzat, 650 metroko luzerarekin eta 8.500 metro karratuko azalerarekin. 

Beraz, gaur egungo Eibar Azitain tartea hiruretan luzeena da. “Aukera horri ezin genion ihes egiten utzi, trenbidearen trazadura aprobetxatuz integratzeko, hiri-orbaina murrizteko eta herritarrek erabili ahal izango duten espazio publikoko eremu garrantzitsua irabazteko. Gainera, arrakasta egiaztatua duen ekimena da, gaur egun dauden beste bi tarteek duten erabilera dela eta”, azpimarratu du Susana García Chueca sailburuak. 

Bere aldetik, Jon Iraola Eibarko alkateak zera esan du: “Lan hauekin jauzi erraldoia ematen dugu Eibarlko eraldaketan. Paseo berri honekin, ez ditugu soilik 10.000 metro karratu berreskuratzen herritarren gozamenerako, baizik eta gure hiriaren bi zati josten ditugu, oztopo historiko bat ezabatuz. Hiriaren erdian zegoen muga  paseatzeko, elkartzeko eta aisialdirako gune  bihurtzen ari gara”. Proiektu hau, Eusko Jaurlaritzaren eta Udalaren arteko lankidetzaren emaitza dena, etorkizuneko belaunalidentzako ondarea izango da. Ardantza eta Amañako zatien antzera, gure oinezkoen mugikortasuna eta bizi-kalitatea hobetu dituzte. Esku-hartze honekin trenbidea estaltzeaz gain, Eibar konektatuago eta atseginago bat eraikitzen ari gara”.