Eibarrek elkartasun-deien esprint bat antolatu du nahi gabeko bakardadeari aurre egiteko

Eibarko Udalak, Danobat, Kutxa Fundazioa eta Untzagako Zentro Sozialarekin batera, dei solidarioen esprint bat bultzatuko du ‘Zilarrezko Haria’ doako zerbitzuaren bidez, nahi gabeko bakardade-egoeran dauden adineko pertsonei telefonoz laguntzeko. 

Ekimenak lau ordu iraungo du, 10:00etatik 14:00etara, eta, tarte horretan, adineko pertsonekin telefono bidezko harremana egingo da konpainia egiteko, hitz egiteko eta entzuteko. Helburua da zerbitzua behar dutenengana hurbiltzea eta sarritan ikusezin geratzen den errealitateari aurre egiten laguntzea.

Jon Iraola Eibarko alkateak erronka honi aurre egiteko erakunde, enpresa eta eragile sozialen arteko elkarlanaren garrantzia nabarmendu du «Nahi gabeko bakardadea gizarte bezala interpelatzen gaituen errealitatea da. Udalak lagundu nahi du Eibarrek hiri hurbil eta konprometitua izaten jarrai dezan eta eibartarrak  lagunduak senti daitezen. Horrelako ekimenek erakusten dutenez, elkarrekin lan eginda gehien behar dutenengana iritsi gaitezke».

Sonia Archeli Gizarte Zerbitzuen eta Adinekoen zinegotziak, berriz, akonpainamenduaren balioa azpimarratu du: «Batzuetan, dei bat bezalako gauza xume batek pertsona baten eguna alda dezake. Zilarrezko Haria zerbitzuak espazio bat eskaintzen die bakardadean bizi diren adineko pertsonei solasteko, entzuteko eta konpainia egiteko. Herritarrak ere inplikatzera animatu nahi ditugu, denok lagun dezakegulako gure inguruan horrelako egoerak atzematen».

«Badira bizitza aldatzen dizuten deiak» lelopean, herritarren inplikazioa ere bilatzen du ekimenak. Horregatik, bakardade-egoeran egon daitekeen adineko pertsonaren bat ezagutzen dutenak animatu nahi dira zerbitzuari informazioa ematera, pertsona horrekin harremanetan jarri eta akonpainamendua eskaini ahal izateko.