Hasierako onarpena eman zaio 2023rako Aurrekontu Orokorrari, 47 milioi euro baino gehiagorekin

Udalaren Osoko Bilkurak, gaur goizean egindako ezohiko bilkuran, hasierako onarpena eman die 2023ko ekitaldirako aurrekontu orokorrari eta dagozkion eranskinei, 47.238.430,61 euroko zenbatekoarekin, hau da, 2 milioi eurotik gorako gehikuntza aurreko urtekoaren aldean.

Alkatetzako memorian adierazten denez, "Gehikuntza hori, funtsean, 2023rako aurreikusitako Foru Funtsari zor zaio, 22.534.445 eurokoa, Gipuzkoako Foru Aldundiak emandako aurrekontuak erakusten duen bezala. Zenbateko hori 2022rako aurreikusitakoa (21.257.411,06 euro) baino askoz handiagoa da".

Udal kontuak aurrera atera dira PSE-EEren (9) aldeko botoekin eta Eibarko EAJ-PNVren (4) eta Eibarko EH-Bilduren (5) abstentzioarekin; Elkarrekin Podemos Eibarrek (1) aurka bozkatu du.

2023ko Aurrekontu Proposamenean jasotako ekintza esanguratsuenetako batzuk inbertsioen atalarekin lotuta daude, 6,72 miloi euroraino igo dena, hiri-inguruneak hobetzeko, irisgarritasuna hobetzeko eta eraikinak egokitzeko proiektuak egitea ahalbidetzeko, eraikin horiei duten balioa eman eta erabilera berriak ezartzeko. 

2023an egingo diren jardueren artean, honako hauek nabarmentzen dira: anbulatorio ingurua eta Julián Etxeberria kalearen ingurua berriz urbanizatzea, hirigunean oinezkoentzako ardatz bihurtzeko; Torrekuako anbulatorio zaharra birmoldatzeko obra, Amaña eta Legarre auzoak espazio anitzeko ekipamenduz zuzkitzeko. Ekipamendu horren erabilera nagusia jubilatuen etxearena izango da; Igogailua eraikitzea, Barakaldo kalea —Electrociclos ondoan— Estaziño eta Azitain arteko trenbidearen gaineko pasealekuarekin lotzeko, Maltzaga-Elgoibar bidegorriarekin lotuz; Legarre kaleko 8. zenbakiko plazaren zoladura berriztea; edota Bustinduitarren kalea eta Arragueta kalea berrurbanizatzea.

Alkatetzaren memorian jasotzen denez, "Obra horien hasierako faseek bat egingo dute denboran beste obra garrantzitsu batzuk abian jartzearekin. Oso aurreratuta daude hauen lanak eta laster hasi ahal izango dira erabiltzen: Ubitxako igogailuak eta Andretxea berria. Eta denbora gutxi barru egiten hasiko diren beste batzuk ere, hala nola Mekolako igogailuak".

Baserri- edo landa-eremuan, Andirao baserritarren elkartearekin adostu da landa-azpiegituretarako aurrekontupartida 350.000 euro gehitzea urteko, bai ekitaldi honetan, bai hurrengo 4 ekitaldietan; hala, bailara guztietako pistak berritzeko eta hobetzeko eskaerei erantzunez.

Gainera, Eibarko ikasleek instalazio onenez goza dezaten eta iaz Eibarko ikastetxeetan obra garrantzitsuak egin ondoren, beste egiteko batzuen artean, San Andres eta Amañako eskoletako hezetasunak konpontzeari ekingo zaio, 150.000 eurotik gorako lanak.

Bestalde, Ingurumeneko Aurrekontuak goranzko joerari eusten dio. 2022an ia 4 aldiz biderkatu zen aurreko ekitaldiarekin alderatuta, eta 700.000 euro ingurura hurbiltzen ari da. Horrez gain, milioi bat euro inguruko inbertsioa egin du Udalak gure herrian euskararen erabilera eta irakaskuntza sustatzeko.

Gizarte-babesari dagokionez, udal alor horretan dauden programa guztiak batuta ateratzen den zenbatekoa 5.181.325,35 eurokoa da; aurreko ekitaldian baino % 8,55 gehiago.

Halaber, 478.000 euroko aurrekontua dago genero-berdintasuna sustatzeko; 2022ko ekitaldikoarekin alderatuta, % 73an igo da.

Bestalde, Garapen Ekonomikorako, Enplegurako eta Berrikuntzarako Sailaren programek % 4,1eko hazkundea izan dute aurreko urtearekin konparatuta; 2,8 milioi inguru izatetik 2,9 milioitik gora izatera pasatu dira, eta enplegua sustatzeko aurrekontua 180.000 euroan gehitu da. Alde horretatik, 2023ko berrikuntza nagusien artean, Eibarko ekialdean lan-orientaziorako bulegoa irekitzea da. Gainera, 1,9 milioi euro inguruko aurrekontua prestatu da enpresa-garapena eta berrikuntza programarako.

Kulturara bideratutako aurrekontuari dagokionez, 450.000 euroan gehitu da, 2022ko aurrekontuaren konparatuta, % 11,7, eta 4.300.339,38 euroraino iritsi da. Zenbateko hori, besteak beste, inpaktuzko kultura-jarduerak antolatzeko eta zabaltzeko erabiliko da, edade guztietako jendearentzat.

Azkenik, aipatzekoa da Gazteria Arloa, 130.000 euro gehiagoko aurrekontuarekin, adin horretarako berariaz prestatutako programak garatzeko.

Udal aurrekontuaren dokumentazioa

Alkatetzaren memoriari, kapitulukako udal-aurrekontuari, diru-sarreren eta gastuen aurrekontuari eta diru-laguntza izendunei buruzko eranskinari buruzko dokumentuak eskuragarri daude jada udalaren webgune honetako "Aurrekontua 2023" atalean.

Iragarkia Gipuzkoako Aldizkari Ofizialean argitaratu eta hurrengo egun baliodunetik aurrera, herritarrek 15 egun balioduneko epea izango dute erreklamazioak aurkezteko, eta aurrekontua behin betiko onartutzat joko da, baldin eta erakustaldiaren amaieran ez bada halakorik aurkeztu.