Eibarrek bere Administrazioa modernizatu du lanpostuen balorazio-sistema berri baten bidez
Udalak amaiera eman dio 2017an hasitako prozesu bati, barne eredu bat ezarrita, soldata-egitura bidezkoagoa, objektiboagoa eta udal-errealitatera egokituagoa bermatzen duena. 1,5 milioi euroko inbertsioa izan duen neurriak benetako funtzioak zehazten ditu, karrera profesionala bultzatzen du eta segurtasun juridikoa indartzen du langileen kudeaketari begira.
Eibarko Udalak Lanpostuen Balorazioaren eta Ordainsarien Erregimena Arautzeko Eskuliburu berria onartu du. Dokumentu estrategiko honek udal-antolaketa sakonki eguneratzen du eta egungo Lanpostuen Zerrendaren (LPZ) zaharkitzeari amaiera ematen dio, zaharkituta geratu baitzen plantillaren errealitate funtzionalari dagokionez.
Gobernu taldeak bultzatutako ekimen honek ahalbidetu du 2017tik martxan zegoen baina emaitza onik lortzen ez zuen prozesu bat desblokeatzea. Urte hauetan zehar, Udalak bi kanpo kontratazio-prozesutara jo du, proposamen bideragarririk lortu gabe. Prozesu horiek, gainera, zenbait kasutan ordainsari-galera zekarten langile nahikorentzat. Egoera horren aurrean, Udalak ikuspegia aldatzea erabaki zuen, eta erakundea zuzenean ezagutzen zuen barneko lantalde bat osatzearen aldeko apustua egin zuen. Talde horrek eredu propio bat diseinatu du, irizpide teknikoetan oinarritua eta tokiko administrazioaren benetako beharretara egokitua.
Sistema berriaren oinarria “puntuak faktoreko” metodoa da, modelo tekniko bat lanpostu bakoitzaren balorazioa egiteko aukera ematen duena zenbait faktoreren arabera, hala nola erantzukizuna, eginkizunen zailtasuna, autonomia edo lan-baldintzak. Ikuspegi honek lanpostuaren balorazioa benetako eginkizunen gainean egin ahal izatea dakar, ez lanpostua betetzen dutenen ezaugarri indibidualen gainean. Horrela, oinarri objektibo eta homogeneo bat kontsolidatzen da udal ordainsari-egiturarako.
Eskuliburua onartu izana aurrerapauso esanguratsua da udal-plantillarentzat; izan ere, barneratutako eginkizunen eta haien aintzatespen profesional eta ekonomikoaren artean zeuden desorekak zuzendu ditu. Ildo horretatik, dokumentuak Administrari Laguntzaile eta Udal Lantaldeko Ofizialen lanpostuak birsailkatu ditu C2 taldetik C1era, haien espezializazio, erantzukizun eta autonomia maila aitortze aldera. Era berean, erakundearen barruan karrera horizontala garatzeko oinarriak ezartzen dira liburuxkan, eta horrek aukera emango du ibilbide profesionalaren aintzatespen progresiboan aurrera egiteko, lanpostuz aldatu beharrik gabe; bestalde, berdintasun- eta gardentasun-printzipioak indartzen dira irizpide objektiboak finkatuz, arbitrariotasunik ez izateko eta diskriminaziorik gabeko baldintzak bermatzeko, baita aldi baterako langileentzat ere.
Neurriaren inpaktu ekonomikoa 1.548.613,80 eurokoa da. Inbertsioa hori dagoeneko aurreikusita zegoen 2026ko udal-aurrekontuan, eta soldata-egitura Udalaren antolamendu-errealitatera egokitzeko borondateari erantzuten dio. Aurrekontuetan aurreikusita egoteak, gainera, agerian uzten du finantza-plangintza bat, lan-baldintzak hobetzearekin eta zerbitzu publikoak indartzearekin bat datorrena.
Antolaketaren eta zuzenbidearen ikuspegitik, eskuliburu berriak tresna tekniko bat ematen dio Udalari, bere egituraren irudi zehatzaz gain, giza baliabideen kudeaketan segurtasuna ematen duena. Prozesuak babes tekniko eta juridikoa izan du, eta sindikatu-ordezkaritzarekiko elkarrizketa-esparruan garatu da, azken dokumentuaren inguruko adostasun zabala lortzea ahalbidetu duten hainbat negoziazio-bileratan gauzatu dena.
Jon Iraola Eibarko alkatearen hitzetan, “bereziki aitortu nahi dut Vanesa zinegotziaren eta bere lantaldearen lan bikaina. Proiektu konplexu bat aurrera ateratzeko dedikazio handiko hilabeteak izan dira, eta emaitza tresna trinko bat da, zalantzarik gabe gure langileen lan-baldintzak hobetzen dituena. Urrats hau beharrezkoa zen, eta gaur-gaurkoz esan dezakegu Eibarrek administrazio bidezkoago eta ordenatuago bat duela, etorkizunera begira hobeto prestatuta dagoena.
Bestalde, Ekonomia Garapen, Enplegu eta Berrikuntza Saileko zinegotzi Vanesa Hortasek azpimarratu duenez, “eskuliburu hau lan zorrotz baten emaitza da, barrutik garatu dena eta erakundea benetan ezagututa, eta horrek, eredu bidezkoagoa, gardenagoa eta pertsona bakoitzak benetan betetzen dituen funtzioetara egokitua eraikitzea ahalbidetzeaz gain, zerbitzu publiko hobea ekarriko du ".
PSE-EEren, EAJ/PNVren aldeko botoekin eta EH-Bilduren eta Elkarrekin Podemosen abstentzioarekin atera da aurrera Lanpostuen Balorazioari eta ordainsarien erregimenaren erregulazioari buruzko eskuliburua.
Beste albiste batzuk
