XLI. Letra Galegoen Eguna ospatuko da Eibarren maiatzaren 8tik 10era, Begoña Caamañori egingo zaion omenaldi batekin eta kultura- eta jai-egitarau zabalarekin

Eibar prest dago kultur egutegian hitzordu nabarmen gisa finkatuta dagoen Letra Galegoen Egunaren beste edizio bat hartzeko. Aurtengoa 41. edizioa izango da, eta Begoña Caamaño kazetari eta idazlea omenduko dute. Ospakizunak maiatzaren 8an, 9an eta 10ean egingo dira, eta Urkizu parkea izango da agertoki nagusia.

Egitaraua maiatzaren 8an, ostirala, hasiko da, 19:00etan, jai batzordeko tabernaren irekierarekin, Lekim Animaziak taldearen haurrentzako animazioarekin batera. Euria egiten badu, jarduerak Galizia Etxean egingo dira. Ondoren, 19:30ean, gaita-poteo alaia izango da Os Galaicos taldearekin eta Eibarko trikitilariekin. Gauean, 22:00etatik 00:30era, Erritmoa Gaztea orkestrak joko du, eta gauerdian queimada handi bat eta zuzeneko musika egongo da, 1:30era arte.

Maiatzaren 9an, larunbata, 11:30ean, kirol- eta tradizio-jarduerekin hasiko da eguna, besteak beste, chaveen tiraldi mistoak, herri-kirolak eta igel-txapelketa —Oberena harategiaren kolaborazioarekin— egingo dira. Arratsaldean, 18:30ean, Os Galaicos eta Eguzki-Fole musika- eta gaita-taldeak, hurrenez hurren, Galiziako dantza- eta musika-erakustaldia eskainiko dute. Egunari amaiera emateko, Solara orkestra arituko da 22:30etik aurrera, eta, ondoren, beste queimada bat eta musika izango dira 2:00ak arte.

Maiatzaren 10ean, igandea, amaituko dira jaiak. 12:00etan bertako musika eta dantzaz gozatzeko aukera egongo da, Kezkaren eta Eibarko trikitilarien eskutik. 14:00etan ohiko lore-eskaintza egingo diote Castelaoren omenezko monumentuari, asteburuko une sinbolikoenetako bat izango dena. Arratsaldean, Odiseak antolatutako mahai-jokoek bide emango diote Miren Guisasola DJaren musika-saioari, 22:00etan ospakizunari amaiera emango diona, batzordeko taberna itxi aurretik.

Jon Iraola Eibarko alkateak nabarmendu duenez, “Letra Galegoen Eguna Eibarren izaera ireki eta abegitsua islatzen duten hitzordu horietako bat da, izan ere, Eibar aniztasunetik eta tradizio desberdinekiko errespetutik eraikitako hiria da”. Iraolak azpimarratu duenez, “horrelako ospakizunek bizikidetza indartzen dute, eta bizirik mantentzen dituzte Eibarko familia askoren ondare kulturalaren parte diren ohiturak”.

Bestalde, Andoni Zabala Kultura zinegotziak “tradizioa, parte-hartzea eta adin guztietarako aisialdia uztartzen dituen horrelako egitarau zabala ahalbidetzen duen batzorde antolatzailearen eta elkarteen lana” nabarmendu du. Zabalak herritarrak animatu ditu “Urkizura hurbildu eta belaunaldiak eta kulturak batzen dituen jai-giroaz gozatzera”.