'Umeak Eskolara' eta 'Dirulaguntzak Ikasleei' izeneko laguntza-programaren beste edizio bat martxan
Eibarko Udala.
Udalak 298.000 euro bideratuko ditu laguntzetarako eta Eibarko dendetan egindako erosketetarako erabili beharko da diru hori. Ikasle bakoitzak 60,10 eurora arteko laguntza jaso ahal izango du. 120,20 eurorainoko laguntza izango dute Diru-sarrerak Bermatzeko Errentaren, Gizarte Larrialdietarako Laguntzaren, edo Bizitzeko Gutxieneko Diru-sarreraren titular diren edo Elikagaien Bankuko programan dauden familietako umeek. Dokumentazioarekin batera aurkezten diren fakturak TicketBAIk egin behar ditu, eta dagokion QR kodea izan behar du.
Eibarko Udalak ‘Umeak Eskolara’ eta ‘Dirulaguntzak Ikasleei’ programen edizio berri bat abian jartzea onartu du, herriko ikasle eta ikasleen familiei laguntzeko. Ikasle bakoitzak 60,10 euro jaso ditzake; laguntzak 120,20 eurora irits daitezke kasu jakin batzuetan, eta Eibarko establezimenduetan egindako erosketetarako erabili behar dira.
Programa honek, 23 urtetik hona egiten ari dena, herritarrengana hurbiltzea du xede, familiek ikasturte-hasieran egin behar duten gastuari lagunduz, eta, aldi berean, Eibarko merkataritzak salmentak handitzea ahalbidetuz. Dirulaguntza horiek bermatzeko, Udalak 298.000 euroko zenbatekoa esleitu du aurtengo aurrekontuetan (219.000 euro ‘Umeak Eskolara’ programarako eta 79.000 euro ‘Dirulaguntzak Ikasleei’ programarako).
Ikasle bakoitzeko ezarritako zenbatekoa 60,10 eurokoa bada ere, iaz zenbait salbuespen ezarri ziren. Hala, familia jakin batzuen premia bereziei erantzunez, ikasle bakoitzeko 120,20 euroko laguntza ezarri zen Bizitzeko Gutxieneko Diru-sarrerak jasotzen dituzten familietako umeen, Diru-sarrerak Bermatzeko Errentaren edo Gizarte Larrialdietarako Laguntzen titularrak diren (2023ko urtarrilaren 31n) edo Elikagaien Bankuaren programaren barruan dauden familietako haurren kasuan.
Azken talde horretan dauden familiak salbu, oro har, eskabide bakoitzeko gehienez ere 60,10 euro eskuratuko dira, honako erosketa-gastu hauek ordaintzeko: arropa, oinetakoak, kirol-materiala, eskola-materiala (testu-liburuak izan ezik), betaurrekoak eta lentillak. Gainera, Eibarko dendetan salmentak sustatzeko asmoz, erosketak Eibarko dendetan egin beharko dira, aurtengo irailaren 1etik urriaren 31ra arte.
‘Umeak Eskolara’ programa honako baldintza hauek betetzen dituzten umeen guraso, tutore edo harrerako pertsona/familientzat da (harrera-zentroak izan ezik): 2008ko urtarrilaren 1etik 2021eko abenduaren 31ra bitartean jaiotako haurrak izan behar dira; eta Eibarren etenik gabe erroldatutakoak, 2023ko urtarrilaren 1etik 2023ko maiatzaren 31ra bitartean.
‘Dirulaguntzak Ikasleei’ programaren kasuan, dirulaguntzak jasoko dituzte irakaskuntza arautu edo okupazionaleko ikasketak (gutxienez 600 orduko iraupena), master edo doktorego homologatuak (ikasturtearen antzeko iraupena) eta pertsona helduen hezkuntzako (EPA) zentro publiko batean ikasketak egiten ari diren ikasleek, baldintza hauek betetzen badituzte: 1998ko urtarrilaren 1etik 2007ko abenduaren 31ra bitartean jaiotakoak izan behar dira; eta Eibarren etenik gabe erroldatutakoak, 2023ko urtarrilaren 1etik 2023ko maiatzaren 31ra bitartean.
Eskaerak Eibar Merkataritza Gune Irekia (ECCA) elkartearen bulegoan aurkeztuko dira, Ego-Gain kaleko 18. zenbakiko beheko solairuan. Bulegoa zabalik egongo da 08:00etatik 14:00etara, astelehenetik ostiralera, irailaren 1etik 15era; irailaren 18tik urriaren 31ra, 09:00etatik 14:00etara, eta 15:00etatik 17:30era, astelehenetik ostegunera, eta ostiraletan 08:00etatik 15:00etara.
Eskatzaileek dokumentu hauek aurkeztu beharko dituzte: eskabide-orria beteta; matrikularen egiaztagiria (‘Dirulaguntzak ikasleentzat’ laguntzen kasuan); libretaren edo banku-kontuaren titulartasuna egiaztatzen duen agiria; eta TicketBAIk Eibarko saltokietan egindako gastuaren fakturak, dirulaguntzaren titularraren izenean irailaren 1etik urriaren 31ra emandakoak, eskuratutako produktuak argi eta zehatz adierazita. Ikaslea adin txikikoa bada, eta kontuaren titulartzat azaltzen dena tutorea edo harrerako pertsona/familia bada, hori egiaztatzen duen dokumentazioa.
Bestalde, 120,20 euroko laguntza eskatzen bada, Eibarko Udaleko Gizarte Zerbitzuen Sailak emandako idazki bat ere aurkeztu beharko da, 2023ko urtarrilaren 31n ezarritako baldintzetako bat betetzen dela egiaztatuz (DSBEren onuradunak eta titularrak, Gizarte Larrialdietarako Laguntzak, Bizitzeko Gutxieneko Diru-sarrerak edo Elikagaien Bankuaren programa) .