Udalak martxan jarri ditu Eibarren finkatutako enpresentzako dirulaguntzak, langabeak kontratatzea xede

Aurten ere udalak Eibarko enpresek langabeak kontratatzeko dirulaguntzen deialdia jarri du martxan. Programa Lanbide-Euskal Enplegu Zerbitzuarekin lankidetzan egiten da.

Aurten, deialdia Eibarko Enplegu eta Tokiko Garapen Planaren barruan kokatzen da (Eusko Jaurlaritzaren proiektu pilotua). Horrek ahalbidetu du oinarriak udaleko diagnostikoan antzemandako lehentasunetara egokitzea, eta laneratzeko zailtasun handienak dituzten kolektiboei zuzendutako laguntza ematea.

2026. urteko laguntza hauen partida ekonomikoa 209.518 eurokoa da; kopuru horretatik 149.518 euro Lanbidetik datoz, eta gainerako 60.000ak udalak berak jarriko ditu. 

Jon Iraola alkatearen hitzetan, “enplegua sortzea ez da bakarrik jarduera ekonomikoa sortzea, baizik eta jarduera hori pertsonentzako aukera bihurtzea. Laguntza hauekin, hain zuzen, helburu hori lortzen lagundu nahi dugu, eta Eibarko enpresetan kontratazio berriak egitea sustatu”.

“Enpresa-ehun sendoa izatea Eibarko indargune handienetako bat da. Enpresei lagundu nahi diegu kontratatzeko urratsa ematen dutenean; eta aukera berri horiek gure herriko langabetuengana iristea ahalbidetu”.

Laguntzak jasotzeko baldintza hauek bete beharko dira:

Enpresa kontratatzailearen kasuan, lantokia eta jarduera ekonomikoa Eibarren duen pertsona fisiko edo juridikoa izan beharko da. Kontratatutako pertsonaren kasuan, Eibarren erroldatuta egon beharko du, gutxienez, 2026ko urtarrilaren 1etik; langabezian egon beharko du, eta Lanbiden enplegu-eskatzaile gisa izena emanda eta alta emanda egon, gutxienez kontratua hasi aurreko hilabetean. Gainera, ezin izango da bigarren mailara arteko ahaidetasun-harremanik izan enpresaburuarekin edo zuzendaritzako karguekin. Era berean, enpresa batek ezingo du kontraturik egin, kontratazio hori aurreko deialdietan diruz lagundua izan denean.

Kontratuak kasuan kasuko hitzarmen kolektiboaren arabera egin beharko dira, eta enpleguaren hazkunde garbia ekarri beharko dute plantillaren batez bestekora, kontratazioaren aurreko sei hilabeteekin alderatuta. Ez dira lau kontratu baino gehiago diruz lagunduko enpresa onuradun bakoitzeko.

Dirulaguntza motak

Programak kontratu mota bat aurreikusten du: lanaldi osoko edo gutxienez % 50eko lanaldi partzialeko kontratu mugagabeak, gutxienez hamabi hilabetekoak; kontratu mugagabearen bidez formalizatu beharko dira, 2026an hasita. 

Kontratu mugagabeek 6.000 euroko dirulaguntza jasoko dute lanaldi osokoak direnean, eta zenbateko hori murriztu egingo da kontratatu-lanaldiaren iraupenaren arabera. Laguntzaren azken zenbatekoak ezingo du gainditu kontratatutako pertsonaren urteko soldata-kostuen % 75, enpresak ordaindu beharreko Gizarte Segurantzako kotizazioa barne.

Laguntza 12.000 eurora iritsi ahalko da, kontratatutako pertsonak diru-sarrerak bermatzeko errenta edo bizitzeko gutxieneko diru-sarrera jasotzen badu, iraupen luzeko langabea bada edo 45 urte baino gehiago baditu. Gainera, kontratatutako pertsonak emakumeak direnean, zenbatekoa % 20 igoko da.

Eskaerak aurkezteko epea irailaren 21ean (astelehena) hasiko da eta 2027ko urtarrilaren 15era arte egongo da zabalik. Eskaerak elektronikoki egin behar dira, udalaren web orriaren bidez (www.eibar.eus). Deialdiaren oinarriak eta aurkeztu beharreko dokumentazioa ere web-orri berean kontsulta daitezke.