KIUB udal bulegoak ia 1.500 kontsulta jaso ditu 2024an, eta banku- eta energia-arloko gehiegikeriez ohartarazi du

Eibarko Kontsumitzailearen Informaziorako Udal Bulegoak (KIUB) 1.493 kontsultari eman zien erantzuna 2024 urtean. Horrela, herritarren eskubideen alde egiteko konpromisoari eutsi dio, hainbat sektoretan, hala nola banketxeetan, energia arloan eta telekomunikazioetan, gero eta ohikoagoak  diren gehiegikeriei aurre egite aldera. 

Aurtengo txostenaren arabera, 2023an baino kontsulta gutxiago jaso dira, nahiz eta aurrez aurreko arreta gehiagotan eman (782tik 1.037ra). Gorakada hori hipoteka-gastuen gaineko zalantzei zor zaie; arazo horretan KIUBek funtsezko eginkizuna izan du, herritarrei aholkuak eman eta erreklamazioak egiten laguntzen baitie.

Bankuen sektorea izan da, berriz ere, kontsumitzaileen artean kezka gehien eragin duena. KIUB elkarteak nabarmendu du urte hasierako hilabeteetan egunean 20 pertsona baino gehiago artatu zituztela, izan ere, erabiltzaileek zailtasuna izan zuten hipoteka-gastuak erreklamatzeko finantza-erakunde batzuen aurrean, zeinek, txostenaren arabera, trabak jartzen zituzten berez legez bezeroei zegozkien kopuruak itzultzeko.   

Bestalde, energia-sektoreak ere kontsulta eta erreklamazio ugari eragin ditu, batik bat fakturazio-akatsei eta kontratazio-iruzurrei buruzkoak. Zentzu horretan, KIUBek aurreratu du 2025ean sektore honen gertuko jarraipena egingo duela. Era berean, aurreikusten du txostenak aurkeztea Merkatuen eta Lehiaren Batzorde Nazionalean (MLBN).

2024an zehar, KIUB bulegoak 163 erreklamazio tramitatu zituen; kexa gehien telefonia eta Internet sektorekoak izan ziren, eta jarraian energia eta produktu elektrikoekin lotutakoak.  Sektore horrek erreklamazio ugari eragiten ditu: fakturazio-arazoak, kontratuak ez betetzea eta eskatu gabeko zerbitzuak kobratzea… 

Kontsulta eta erreklamazioei erantzuteaz gain, KIUBek formazio-jarduerak ere antolatu ditu, herritarrek euren eskubideen gaineko kontzientzia izan dezaten. Hainbat gai jorratu dira: argi- eta gas-kontratuetako iruzurrak nola detektatu, etxez etxeko erosketetan atzera egiteko eskubidearen garrantzia, eta phishing erasoaren arriskuak Internet bidezko erosketetan.

Oraintsu ezarritako aurretiko hitzordua dela-eta, oso balorazio ona egin du KIUBek, lana hobeto antolatzeko eta arreta eraginkorragoa eskaintzeko aukera ematen baitu sistemak.  Nolanahi ere, txostenak azpimarratzen du, kasu larrietan, hitzordurik eskatu gabe ere ematen zaiela arreta herritarrei, aukera izanez gero.