Igerilekuak eta ur-txorrotak martxan egongo dira ekainaren 7tik irailaren 28ra

Eibarko Udalak iragarri duenez, ekainaren 7an (larunbata) kanpoko udal-igerilekuak ireki eta herriko hainbat gunetan dauden ur-txorrotak aktibatuko dira, udako denboraldiari hasiera emanez. Instalazio hauek funtzionamenduan egongo dira irailaren 28ra arte, eta herritarrei aisialdiko eta aire zabaleko aukera freskagarri bat eskainiko diete, udako beroari aurre egiteko.

Ipuruako kirol-instalazioen kanpoko igerilekuak eta Txaltxazelaiko ur-txorrotak egunero egongo dira eskuragarri, ordutegi zabalarekin, familiei, pertsona nagusiei eta gazteei erabiltzeko aukera emateko.

Jon Iraola Eibarko alkateak: "Badator eguraldi ona eta udalaren helburua da aisialdirako espazioak eskaintzea adin guztietako pertsonentzat. Igerilekuak eta ur-txorrotak beroari aurre egiteko ez ezik, elkarbizitza komunitarioa sustatzeko modu bat ere bada”.

Horren harira, hauxe gehitu du: “Horrelako baliabideak hiri bizigarriago baten alde eta espazio publikoa pertsonen zerbitzura egongo den hiri baten alde egindako apustuaren parte dira. Iaz txorrotek izandako arrakastak erakusten digu horrelako instalazioek harrera ona dutela herritarren artean”.

Udalak azpimarratu du ur-instalazio hauen mantentze-lanak modu erregularrean egiten direla eta arreta berezia jartzen zaiola segurtasunari eta higieneari.  Eta gogorarazi du uraren erabilera arduratsua egin behar dela, bereziki, klima-larrialdiko testuinguruan, eta bateratu behar dela aisialdia jasangarritasunarekiko konpromisoarekin.