Edukira salto egin | Salto egin nabigazioara

Eusko Jaurlaritzako Lurralde Plangintza Sailak hasiera eman dio herritarrek Debabarreneko Lurralde Plan Partzialaren diagnostikoa egiten parte hartzeko prozesuari

2022/12/15

Eskualdean erronkak, premiak eta aukerak identifikatzen parte hartzeko kanalak abenduaren 15ean irekiko dira, eta hilabete batean egongo dira zabalik. Abenduaren 15 eta 16an elkarrizketak egingo dira kalean, pertsonek bederatzi gairi buruz duten iritzia jasotzeko. Halaber, informazio-hitzaldi bat egingo da gaur osteguna, abenduak 15, 18:30ean, Errebal Plazan.

Eusko Jaurlaritzako Lurralde Plangintza, Etxebizitza eta Garraio Sailak herritarrek Debabarreneko Eremu Funtzionaleko Lurralde Plan Partziala idazteko hasierako dokumentua izango den diagnostikoa lantzen parte hartzeko prozesuari hasiera eman dio aurtengo abenduan.

LPPak lurraldea antolatzeko irizpideak zehazten ditu. Kasu honetan, honako udalerri hauek daude eraginpean hartuta: Deba, Eibar, Elgoibar, Ermua, Mallabia, Mendaro, Mutriku eta Soraluze. “Prozesu luzea da, eta diagnostikoarekin abiatu da orain; herritarrak parte hartzera animatu nahi ditugu, beren ikuspuntutik Debabarreneko erronkak, premiak eta aukerak zein diren adieraz dezaten”, adierazi du Lurralde Plangintzaren eta Hiri Agendaren sailburuorde Miguel de los Toyosek.

Abenduaren 1ean eta 2an herritarrei galdetzeko kaleko elkarrizketak hasi ziren. Inkesta horiek gaur eta bihar ere, abenduak 15 eta 16, egingo dira. Halaber, informazio-hitzaldi bat egingo da gaur osteguna, abenduak 15,  18:30ean, Errebal Plazia eraikinean. Gaur bertan, kanal digitalen bidez parte hartzeko epea irekiko da, eta urtarrilaren 15era arte egongo da zabalik (www.lurraldeplana-debabarrena.eus). Azkenik, Eusko Jaurlaritzak herritarrek parte hartzeko eskaintzen duen kanalean (www.irekia.euskadi.eus), eremu funtzional horretako erronkarik eta premiarik garrantzitsuenei, lehentasunik handiena dutenei eta eskualdeak dituen aukerei buruzko eztabaida ireki bat planteatuko da. 

Zehazki, herritarrek honako bederatzi gai hauen inguruan dituzten ideiak bildu nahi dira diagnostikoan: ingurune naturala eta azpiegitura berdea, mugikortasuna, baliabide naturalak eta hondakinak, lurralde-erlazioa eta ekipamendu handiak, etxebizitza eta hiri-berroneratzea, jarduera ekonomikoa, ondarea eta identitatea, klima-aldaketa eta osasuna, eta inklusibitatea eta euskara.