Petankarako bi pista jarri dira Torrekuako parkean

Torrekuako parkeak kirolerako, aisialdirako eta auzotarrak elkartzeko gune berria izango du hemendik aurrera. Eibarko Udalak lehiaketa ofizialeko bi petanka-pista berri prestatu ditu (bakoitza 4 metro zabal eta 15 metroko luzerakoa), lehendik dagoen aisialdiko gune bat aprobetxatuz eta hobetuz.

Obrak 19.906,38 euroko inbertsioa ekarri du, eta lanen helburua izan da espazioa egokitzea petanka-jokoa praktikatzeko, eta, aldi berean tokiaren izaera irekia eta eskuragarria mantentzea. Bi pistak guztiz irisgarriak dira, eta ingurunean integratu dira, itzal-eremuak eta parkean dagoeneko jarrita dauden eserlekuak aprobetxatuz.

Horrela, gune berriak aukera emango du kirola egitea atsedenarekin uztartzeko, eta leku bat eskainiko du jolasteko, atseden hartzeko eta denbora elkarrekin partekatzeko. 

Torrekuako zentro soziala inauguratu ondoren erabiltzaileek udalari egindako eskaera baten ondorioz sortu zen ekimena.

Eibarko alkateak adierazi duenez, “Torrekuako zentro soziala inauguratu ondoren, eraikineko erabiltzaile batzuek toki horretan petanka-pista batzuk jartzea planteatu ziguten. Ideia bikaina iruditu zitzaigun, eskaera zehatz bati erantzuten ziolako eta, gainera, parkean lehendik zegoen eremu bat aprobetxatzeko aukera ematen zuelako”.

Horren harira, alkateak nabarmendu du jardunaren helburua dela “gure auzoetako espazio publikoak hobetzen jarraitzea eta erabiltzaileek egiten dizkiguten behar eta proposamenetara egokitzea”.

“Petanka-jokoa kirola, aisialdia eta elkarbizitza uztartzen dituen jarduera da. Pista hauek kirola egiteko leku bat ez ezik, auzoko jendearentzako elkargune berri bat ere izatea nahi genuen. Gainera, itzal-guneak eta eserlekuak aprobetxatu ditugu, eta espazioa erosoa eta atsegina izatea lortu dugu”, gaineratu du.

Torrekuako jarduera osatzeko, parkeko eserlekuak margotu dira. Esku-hartze horrek altzariak eta espazio osoa berritzen eta hobetzen lagundu du.

Instalazio berri hauekin, Torrekuako parkeak topagune berri bat izango du, balioan jarriz jada parke moduan erabiltzen zen toki bati.