‘Eibarko Industrien Ekosarea’ programak bigarren edizioa itxi du, 11 enpresa parte-hartzailerekin eta 33 jarduketekin

Aurtengo ‘Eibarko Industrien Ekosarea’ programaren edizioan, Eibarko 11 industria-enpresak hartu dute parte eta 33 jarduketa egin dira. Eibarko Udalak Ekonomiaren Garapen, Enplegu eta Berrikuntza eta Ingurumen sailen bidez sustatutako ekimen honen helburua zera da: tokiko industria-sarearen lehiakortasuna indartzea, jasangarritasun-irizpideak txertatuz eta ingurumena eta energia hobetzeko neurriak ezarriz.

Instalazioen Ingeniaritzan, Mantentze-lanetan, Energian eta Ingurumenean espezializatutako ONDOAN euskal enpresa-taldeak egin ditu programako aholkularitza-lanak, eta parte hartu duten enpresei aholkularitza teknikoa eman die hobetzeko aukerak identifikatzeko eta produkzio-eredu eraginkorrago eta jasangarriagoak izateko. 

Jon Iraola Eibarko alkateak eraldaketa-prozesu horretan industria-sareari laguntzearen garrantzia azpimarratu du: «Industria Eibarko identitatearen parte da, eta gure ekonomiaren eta enpleguaren zutabe nagusietako bat izaten jarraitzen du. Gure enpresen ondoan egon behar dugu datozen aldaketen aurrean, energia- eta ingurumen-erronka berrietara egokitzen lagunduz, lehiakortasunik galdu gabe. Udalean gure industria-saretik gertu egon nahi dugu, industria modernoago, eraginkorrago eta prestatuago baterantz aurrera egitea ahalbidetuko duten tresna eta baliabideak eskainiz».

Aurtengo edizioan, industria-enpresek energiaren eta ingurumenaren arloan egiten duten kudeaketaren esparru nagusiak landu dira, besteak beste, ingurumen-legeriara egokitzapena, karbono-aztarnaren murrizketa, energia-eraginkortasunaren hobekuntza eta inbertsio berderako aukeren identifikazioa. Esparru horiek aukera ematen dute bai araudia egokitzeko beharrei heltzeko bai kontsumoak, emisioak eta kostuak murrizten lagunduko duten neurriak detektatzeko, bai eta eskuragarri dauden finantzazio-aukerak eta pizgarriak aprobetxatzeko ere.

Vanesa Hortas Ekonomiaren Garapeneko zinegotziak garrantzitsutzat jo ditu lortutako emaitzak eta parte hartu duten enpresen inplikazioa: «Bigarren edizio honetako emaitzek erakusten dute gure enpresek interesa eta konpromisoa dutela beren ekoizpen-prozesuak hobetzeko. 11 enpresatan egindako 33 jarduketei esker, aukera zehatzak identifikatu dira kontsumoak murrizteko, energia-eraginkortasuna hobetzeko eta ingurumen-araudia betetzeko. Nahi duguna da Eibarko Industrien Ekosarea gune bat izatea ezagutza partekatzeko, aukera berriak hautemateko eta gure enpresek jasangarritasuna beren egunerokotasunean sartzeko».

Informazioa, sentsibilizazioa eta esperientzien trukea

Aholkularitza teknikoaz gain, programak hainbat tresna eta jarduera eskaini ditu, informaziorako sarbidea errazteko eta industria-ehunaren jasangarritasunarekiko sentsibilizatzen laguntzeko. www.eibarkoindustrienekosarea.eus web-orriaren bidez, egindako jarduketei buruzko berriak argitaratu dira, egindako lana eta enpresa parte-hartzaileek bultzatutako hobekuntza-ekimenak agerian jarriz.

Era berean, hainbat webinar antolatu dira enpresen jasangarritasunarekin eta energiaren eta ingurumenaren kudeaketarekin lotutako gai interesgarriei buruzko informazioa eta ezagutza partekatzeko, hala, enpresen artean ikaskuntza eta esperientzien trukea sustatzen lagunduz.

Aurtengo edizioari amaiera emateko, laburpen-bideo bat eta informazio-liburuxka bat prestatu dituzte, programaren eduki eta emaitza nagusiak biltzen dituena. Bi material horiek interesa duten pertsona eta erakunde guztientzat daude eskuragarri ‘ ‘Eibarko Industrien Ekosarea’ web-orrian eta Udalaren webgunean.

Industria jasangarriago eta lehiakorrago batekiko konpromisoa

Edizio hau bukatuta, Eibarko Udalak berretsi egiten du udalerriko industria-sareari laguntzeko apustua, trantsizio energetikoari eta ingurumenekoari lotutako erronketan. ‘Eibarko Industrien Ekosarea’ bezalako ekimenek aholkularitza espezializatua enpresetara hurbiltzen laguntzen dute, hobetzeko aukerak identifikatzea erraztuz eta industria-jarduera eraginkorragoa, arduratsuagoa eta araudi- eta merkatu-eskakizun berriei aurre egiteko prestatuagoa sustatuz.

Enpresen parte-hartzeak eta egindako jarduketek enpresa-kudeaketan jasangarritasuna txertatu eta Eibarko industriarentzat lehiakortasun-palanka bihurtu nahi duen ekimenaren irismena islatzen dute. Horregatik, Udalak eskerrak eman nahi dizkie parte hartu duten enpresei, haien prozesuak aztertu eta hobekuntza-aukera berriak analizatzeko prestutasuna ezinbestekoa izan baita edizio honetan.

Jasangarritasunarekin duten konpromisoak tokiko industria eraginkorragoa, arduratsuagoa eta lehiakorragoa bultzatzen laguntzen du, eta agerian uzten du administrazio publikoaren eta enpresa-ehunaren arteko lankidetzaren garrantzia, ekoizpen-eredu jasangarriago baterantz aurrera egiteko.

• Bideoa: Eibarko Industrien Ekosarea II. programa