Maltzaga-Soraluzeko bidegorriaren proiektuaren idazketa lizitatuko du Diputazioko Jasangarritasun Sailak, eta lanak 2027an hastea aurreikusten du

Datozen asteetan Gipuzkoako Foru Aldundiko Jasangarritasun Sailak Maltzaga-Soraluze bidegorria egiteko proiektua idazteko lizitazioa egingo du; lizitazio hori urrats erabakigarria izango da Deba bailarako bizikleta bidezko konexioa amaitzeko eta, aldi berean, Deba Behea eta Deba Goiena behin betiko lotzeko.

Maltzaga-Soraluze tartea da geratzen den bakarra, oinezkoentzako eta txirrindularientzako bideen bitartez, Eibar eta Elgoibar Soraluzerekin eta Debagoiena eskualdearekin lotzeko. Hala, erantzuna emango zaio aspaldi egiten ari zen eskabide bati.

Lizitazioak aukera emango du behin betiko trazadura, soluzio teknikoak, egikaritze-epeak eta jarduketaren aurrekontua zehazteko. Gipuzkoako Foru Aldundiko Jasangarritasun Sailaren konpromisoa da proiektuaren idazketa urte honetan zehar amaitzea eta lanak 2027an hastea.

Teknikoki konplexua den trazadura bat da, zenbait puntutan mendi-hegaletatik doana, egungo azpiegitura batzuetatik hurbil eta baldintzatzaile hidraulikoak eta bidekoak dituzten inguruetan. Proiektuak ahalik eta loturarik onena zehaztu beharko du eremuan, segurtasuna, ingurugiro-integrazioa eta ibilbidearen jarraitutasuna bermatze aldera.

Jose Ignacio Asensio Jasangarritasuneko diputatuak azpimarratu duenez, “urrats sendo bat egiten dugu Deba bailararako estrategikoa den konexio bat gauzatzeko. Aurten proiektua idatzi, eta 2027an obrei ekingo diegu”. Era berean, azpimarratu du aukera emango duela mugikortasun jasangarriago, seguruago eta irisgarriago baterantz aurrera egiteko, eta, era berean, eskualdeen arteko eguneroko joan-etorriak oinez eta bizikletaz egin ahal izatea errazteko”.

Jon Iraola Eibarko alkateak aurrerapen honek Deba bailarari ekarriko dion aurrerapena nabarmendu du. “Urte askotan egon gara albiste honen zain. Maltzaga eta Soraluze herrien arteko konexioa zen bailarako bizikletentzako bidea osatzeko falta zen zatia, eta, gaur, proiektua gauzatzeko urrats garrantzitsua egingo dugu”, adierazi du.

Iraolak azpimarratu du, gainera, azpiegitura honen bidez udalerrien arteko eguneroko konexioak hobetuko direla, eta mugitzeko alternatiba berriak eskainiko. “Eibarri eta eskualde osoari ate bat irekitzen dio, mugikortasun seguruago, osasungarriago eta jasangarriago baterantz, gaur egun modu jarraian lotuta ez dauden herrien artean pertsona asko oinez zein bizikletaz ibili ahal izatea ekarriko baitu”, gaineratu du.

Eibarko alkateak eskertu nahi izan du Gipuzkoako Foru Aldundiko Jasangarritasun Sailak emandako bultzada, baita administrazioen arteko erakunde-lankidetza ere. “Proiektu hau batera egindako lan baten eta Deba bailarako udalerrien partekatzen duten aldarrikapen baten emaitza da. Azpiegitura estrategiko bat da, eskualdeen arteko kohesioa indartu eta gure herritarren bizi-kalitatea hobetzen duena.

Horrela, Jasangarritasun Sailak jarraitzen du lurraldeko bizikleta-sarea bultzatzen, udalerrien arteko lotura sendotzen eta ibilgailu pribatuari benetako alternatibak eskaintzen, mugikortasun-eredu jasangarriago eta orekatuago baterantz aurrera egiteko konpromisoa betetze aldera.