Kontrataziorako eta enplegurako prestakuntzarako zuzeneko laguntzak, 2024rako Udalak enpleguaren arloan dituen ardatzak
Artxiboko irudia. Eibarko Udala.
2023an, enpresentzako zuzeneko laguntzak 323,880 eurokoak izan ziren, eta 33 pertsona kontratatzea lortu zen. Gainera, Udalak 17 pertsona gehiago kontratatu zituen proiektu espezifikoak gauzatzeko. Udalak bilera egingo du Eusko Jaurlaritzako Enplegu Sailarekin, langabeziari buruzko azken datuak aztertu eta datuak murrizteko neurriak hartzeko.
Gaur goizean, Jon Iraola alkateak eta Vanesa Hortas Ekonomiaren Garapen, Enplegu eta Berrikuntzako zinegotziak hirian enplegua sustatzeko Udalak 2023an abian jarritako ekintzen berri eman dute. Ekintza horiek, alde batetik, kontratazioa sustatzeko programa eta neurrietan gauzatu dira, eta, bestetik, Eibarko langabeen lanbide-heziketan.
2023an, funtsezko ekimenetako bat LANBIDEk Eibarko Udaleko Ekonomiaren Garapen, Enplegu eta Berrikuntza Sailarekin eta Pertsonaleko Sailarekin batera sustatutako urteko programa izan zen.
Programa horren bidez, bi kontratu motatarako dirulaguntzak kudeatu dira: Udalak jendea zuzenean kontratatzea eta zuzeneko dirulaguntzak ematea Eibarko langabetuak kontratatzen dituzten enpresei. Laguntza horien bidez, enpresa-sektorearen eta tokiko gobernuaren arteko lankidetza sustatu nahi izan zen, hirian enplegu-aukera gehiago sortzeko.
Vanesa Hortas zinegotziak azpimarratu du Udala ahalegin handia egiten ari dela arlo honetan, eta zera azpimarratu du: "Tokiko enprsen eskaria eta interesa ikusita, handitu egin dugu enplegua sortzeko laguntzetara bideratutako kreditua".
"Argi utzi behar da udal batek eskumen gutxi dituela enpleguaren arloan. Hala ere, uste dugu lagundu egin behar dugula eta gure aletxoa jarri, eta, horregatik, lanean jarraituko dugu, gure ahalmenen eta eskumenen barruan, herrian langabezia murrizten lagunduko duten ekimen berrien alde ", amaitu du Hortasek.
Alde horretatik, eta datuei dagokienez, Eibarko langabetuak kontratatzen dituzten enpresentzako zuzeneko laguntzek eragin nabarmena izan zuten bertako lan-merkatuan. Guztira 323.880 euroko aurrekontuarekin, herriko enpresek 33 langabetu kontratatzea lortu zen.
Udalaren zuzeneko kontratazioari dagokionez, 2023an zehar hainbat proiektu jarri ziren abian arlo desberdinetan, hala nola administrazio-laguntza, instalazioen mantentze-lanak, hiri- eta gizarte-hobekuntzak, besteak beste. Kontratu horiek, lanpostu eta zeregin oso ezberdinekoak, lana egiteko aukera eman zieten Eibarko 17 langabeturi.
Neurri horiez gain, Eibarko Udalak enplegurako prestakuntza-programak ere aktiboki sustatu ditu, hainbat entitate eta erakunderekin lankidetzan.
Bestalde, Jon Iraola Eibarko alkatea kezkatuta agertu da duela gutxi ezagututako otsaileko langabezia-kopuruekin: "Enplegu-galerak ez die soilik pertsonei eragiten, hiriaren bizitasun ekonomiko eta sozialean ere badu eraginik. Udalak, orain arte bezala, bere esku dagoen guztia egiten jarraituko du egoera horri aurre egiteko ".
Iraolak gaineratu du laster bilera bat izango duela Eusko Jaurlaritzako Enplegu Sailarekin, egoera aztertzeko eta, lehenbailehen, egoera arintzeko neurri eraginkorrak hartzeko. "Funtsezkoa da eremu publikotik elkarrekin lan egitea, bakoitzak bere eskumen-esparrutik, egoera bideratzeko. Horregatik, datuen berri izan bezain laster, Eusko Jaurlaritzako Enplegu Sailarekin harremanetan jarri nintzen, nire ustez premiazkoa baita gure hirian enplegua sustatzeko neurri eraginkorrak abian jartzea ".
- Jon Iraola alkatea eta Vanesa Hortas, Garapen Ekonomiko, Enplegu eta Berrikuntzako zinegotzia.
