Felix Elcoroiribek larunbatean jasoko du “Txopitea eta Pakea” saria

Larunbatean, 12:00etan, Txopitea eta Pakea saria emateko ekitaldia egingo da. Edizio honetan Felix Elcoroiribe omenduko da, egindako ibilbideagatik eta eibartarrekin izan duen konpromisoagatik. Zeremoniak herritarren zerbitzura lan egiteko modu bat aitortuko du, lan diskretuan, bizikidetzan eta guztion onuran oinarritua.

Saria —Jorge Oteizaren eskultura enblematikoaren erreplika txikia—, hiriak bere herritar edo elkarte garrantzitsuenei ematen dien merezimendurik handiena da. Balio batzuk aitortzeko sortu zen saria, besteak beste, dedikazioa, esfortzua eta Eibarrekiko konpromisoa.

Felix Elcoroiribek, 1946an Arragueta zeharkalean jaioa, ibilbide luzea egin du hezkuntzarekin, teknikarekin eta zerbitzu publikoarekin lotua. Formazioz ingeniaria zen eta matematika zalea. Irakasle aritu zen urte luzez, eta bere lan-bizitza gehiena Eibarko Udalean egin zuen, non Zerbitzu Saileko zuzendari tekniko izatera iritsi zen. Sinestezina da, gaur egun ere, herriaz duen ezagutza itzela.

Jubilatu ondoren, jarraitu egin du lanean bizitza sozial eta asoziatiboan buru-belarri sartuta, batez ere Untzaga Zentro Sozialean; bertako presidente izan zen hamabi urtez eta modernizazio sakona eragin zuen. Beste arlo batzuetan ere jardun izan du, hala nola pertsona nagusien mugimenduan, herri-kulturan, koru-kantuan eta Eibarko KEren defentsan, betiere gure herriaren izena leku guztietara eramanez.

Jon Iraola alkateak aitortza honen esanahia azpimarratu nahi izan du: “Inork gutxik bezala ordezkatzen du Felixek herritarrekiko konpromiso lasai eta jarraitua. Hamarkadetan zehar egin du lan Eibarren alde, zorroztasunez, gertutasunez eta zerbitzu-bokazio handiz. Sari hau eskertza kolektibo bat da elkarbizitza eta besteen ongizatea hobetzera dedikatutako bizitza bati”.

Ekitaldi irekia izango da udaletxeko pleno aretoan