Arreta psikosozialaren programa arrakastatsua

Eibarko Arreta Psikosozialaren Programak —2023ko urrian martxan jarri zena—"oso balantze positiboa" egiten du lehen urteari buruz, Udalak egindako balorazioan azpimarratu denez. Ekimena herriko adinekoei zuzenduta dago, eta 2024-2025 ikasturtean 102 lagunek hartu dute parte (87 emakumezko eta 15 gizonezko), lau zentro sozialetan: Ipurua, Urki, Behekotokia eta Untzaga.

Jon Iraola Eibarko alkateak programaren garrantzia eta adinekoen eguneroko bizitzan duen eragina azpimarratu du. "Eibarko Udalean harro gaude Arreta Psikosozialaren Programaren ibilbideaz eta emaitzez.  Oso denbora gutxian, funtsezko tresna bihurtu da pertsona nagusientzat, haien autonomia mantentzen, ongizate emozionala hobetzen eta barruko gizarte-harremanak sendotzen lagunduz.

“Halako ekimenek Eibarrek hiria gertutasunetik eta zaintzatik ulertzeko moduarekin duen konpromisoa islatzen dute. Nahi duguna da inor ez sentitzea bakarrik edo isolatuta, eta, horregatik egiten dugu apustu arreta indibiduala elkarbizitzarekin eta ikaskuntza partekatuarekin bateratzen dituzten programen alde”.

Programak taldekako eta banakako saioak konbinatzen ditu, zeinetan parte-hartzaile bakoitzaren jarraipen zehatza egiten den, eboluzioaren eta bertaratze-kontrolaren fitxen bidez.  Sistema honek ahultasun-egoera posibleak edo premia espezifikoak detektatzeko aukera ematen du, arreta pertsonalizatua eta gizarte-isolamenduaren prebentzioa indartuz.

Saioak bi ordukoak dira eta bizi-kalitatea hobetzeko eta zahartzaro aktibo eta osasungarria izateko diseinatutako ariketak egiten dira. Gainera, ikastaroak jarduera ludiko eta kulturalak antolatzen ditu, harrera ezin hobea izan dutenak parte-hartzaileen artean.

Sonia Archeli Gizarte Zerbitzuetako eta Adineko Pertsonen zinegotziak Udalak horrelako programekin duen konpromisoa nabarmendu du: "Zahartze aktiboa eta osasungarria bultzatuko duten programen alde egitea pertsonen bizi-kalitatean inbertitzea dela uste dugu, eta, beraz, Gizarte Zerbitzuetatik horrelako proiektuetan jartzen dugu beti begirada".

Gainera, adierazi duenez, "harremanak errazten dituzten proiektuak eta programak dira, nahi gabeko bakardadea prebenitu eta adinekoen parte-hartzea sustatzen dutenak, beren bizitzaren erdigunean jarriz, iritziak kontuan hartuz eta prozesuetan lagunduz, protagonismoa kendu gabe".

"Haiekin sortutako jarduerek arrakastaren bermea emango digute, bai atxikimenduan, bai parte-hartzean, eta, hala, bi urte hauetan oso emaitza onak lortu ditugu", amaitu du Archelik.

Ikastaroa amaitzean, gogobetetze-inkesta bat egin da, eta emaitza oso positiboak lortu dira, batez ere parte-hartzaileen eta saioak zuzentzen dituzten profesionalen arteko harremanari dagokionez.

2025-2026 ikasturte berriari begira, Eibarko Udalak berriz ere Arreta Psikosozialeko Programa jarriko du martxan, autonomia pertsonala sustatzeko, narriadura fisikoa eta mentala prebenitzeko eta topaketarako eta ongizaterako guneak sortzen jarraitzeko.

Azkenik, hauxe azpimarratu du Iraolak: “Pertsonak erdigunean jarri, haien premiei erantzun eta gizarte humanoago, solidarioago eta kohesionatuago bat eraikiko duten politikak sustatzen jarraituko dugu.  Programa honen arrakastak erakusten du ezen herritarren sentsibilitatearekin eta inplikazioarekin lan egiten denean, emaitzak oso onak izaten direla".

Ikastaro berria urriaren 15ean hasiko da, eta interesdunek herriko lau zentroetako edozeinetan eman ahalko dute izena:  Ipurua, Urki, Behekotokia eta Untzaga.