Edukira salto egin | Salto egin nabigazioara

Udalak herritarren segurtasunerako protokoloa aktibatu du, prezipitazio handiak eta elurteak direla eta

2023/01/17

Agindua gaur asteartea, urtarrilak 17, ipini da martxan eta Eusko Jaurlaritzako Segurtasun Sailak alarma-egoera amaitutzat ematen duenean bukatuko da.

Eusko Jaurlaritzako Segurtasun Sailak gaur asteartea, urtarrilak 17, fenomeno meteorologiko desberdinengatik alerta ezarri zuen. Horren aurrean, Eibarko Udalak alarma-protokoloa ipini du martxan eta honako erabaki hauek hartu ditu:

1.- Ubideak eta saretak garbitzea eta hiriko zenbait tokitan sortzen ari diren ur-putzuak xurgatzea.

2.- Elurra kentzeko makinak herrian bertan eta landa auzoetan aktibatzea. Hala, elurra kendu eta gatza botako dute herriko eta landa auzoetako errepide eta bideetan.

3.- Udal lantaldeak eta Debabarrenako Mankomunitateak elurra eta izotza kenduko dute oinezkoentzako guneetatik herrian.

4.- Gatza banatuko da udal eraikin publikoetan bertako mantentze-lanen ardura daukaten langileek eraikinen sarreretan gatza bota dezaten.

5.- Udaltzaingoa koordinatzaile izendatzea euriengatik eta elurteengatik egon daitezkeen abisu deiak direla eta.