Udalak bigarren aldiz antolatu du "Komunikazioa eta Gardentasuna administrazio publikoetan" izeneko Jardunaldia azaroaren 23rako
Irudian, Jon Iraola alkatea eta Ana Telleria, Gobernua Zabalik Ordezkaritzako zinegotzi arduraduna.
Ekitaldiak helburu hauxe du: administrazio publikoek komunikazioaren eta gardentasunaren alorrean egin duten lana ezagutaraztea, eta soluzioak proposatzea era guztietako erakunde publikoetarako. 2021ean bezala, Coliseon egingo da hilaren 23an 09:00etatik 13:45era. Guztira, 6 hitzaldi eta mahai-inguru bat egingo dira, alorrean adituak direnen eskutik. Bertan parte hartu nahi dutenek izena eman beharko dute urriaren 26tik azaroaren 16ra, aldez aurretik www.eibar.eus udal-webgunean eskuragarri egongo den formularioa beteta. Jardunaldia streaming bidez ere ikusi ahal izango da Udalaren YouTube kanalaren bidez.
Eibarko Udalak jardunaldi bat antolatu du azaroaren 23rako II. Jardunaldia: Komunikazioa eta Gardentasuna administrazio publikoetan izenekoa; Coliseo antzokian egingo da, 09:00etatik 13:45era eta streaming bidez ere jarraitu ahal izango da, erakundearen YouTube kanal ofizialaren bidez. Halaber, sare sozialetan jardunaldiaren zabalkundea egiteko #EibarKomunika traola erabiliko da, 2021ean egin zen bezala.
Ekimen honekin —2021eko otsailean onartutako 2021-2023 Komunikazio eta Gardentasun Planaren parte diren jarduerekin batera— lortu nahi dena zera da: administrazio publikoek komunikazio eta gardentasunaren alorrean duten eginkizuna ezagutaraztea, eta, halaber, erakunde publikoei gai horietan hobetzeko soluzioak proposatzea.
Aurtengo jardunaldian, besteak beste, honako gai hauek landuko dira: komunikazio digitala, krisi-egoeren komunikazioa, marka-irudia, webguneen irisgarritasuna, analitika digitala, gobernu ona, gardentasun aktibo eta pasiboa, eta salaketa-kanalak. Ekitaldia sektore publikoko komunikazio-arloko profesionalei eta, oro har, administrazio publikoko langileei dago zuzendua, bai eta komunikazio instituzionalean eta marketinean aditu direnei, komunikazio, kazetaritza edo antzeko graduko ikasleei, edo gaian interesa duten komunikabideei ere.
Jon Iraola Eibarko alkatearen hitzetan, “duela bi urtera arte oso gutxi ziren administrazio publikoetan halako jardunaldi edo kongresuak, eta are gutxiago tokiko erakundeetan. Horregatik, 2021ean lehen jardunaldia antolatuta —esparru horretan Euskadin egin zen lehena—, Eibarko Udalak urrats bat harago egin nahi izan zuen eta bozgorailu gisa jokatu, era guztietako erakunde publikoei komunikazio instituzionalarekin, gardentasunarekin eta gobernu onarekin lotutako alderdiak helarazteko”.
Eta zera gehitu du: “Bigarren edizio honekin, jarraipena eman nahi diogu ekimenari, eta, beste behin, aukera aprobetxatu irtenbideak ematen jarraitzeko, balio-edukia sortzeko eta beste erakunde batzuen inspirazio iturri izaten saiatzeko”.
Ana Telleria Gobernu Zabalik Ordezkaritzaren zinegotziak, bestalde, gonbidapena egiten die komunikazio korporatiboaren eta instituzionalaren arloko funtzionario eta adituei ekimen honen bigarren edizioan parte hartzera, eta jakinarazi du “jardunaldian izena emateko epea zabalik egongo dela urriaren 26tik azaroaren 16ra. Interesa duten guztiek formulario bat bete beharko dute www.eibar.eus udal-webguneak egun horietan izango duen atal berezi batean.
6 hitzaldi eta mahai-inguru bat egingo dira, alorrean adituak direnen eskutik
Jardunaldiaren egitaraua sei hitzaldik osatzen dute eta hizlariak komunikazio korporatibo eta instituzionalean, marketin digitalean eta gobernu onean diharduten profesionalak izango dira. Amaieran mahai-inguru bat egingo da hitzaldi bakoitzaren ideia nagusiei buruzko azterketa eta hausnarketa egiteko; jardunaldia 09:15ean hasi eta 13:45ean amaituko da. Jardunaldi osoan aldibereko itzulpen zerbitzua eskainiko da, bertaratzen direnentzat zein ekitaldia streaming bidez jarraitzen dutenentzat, Udalaren YouTubeko kanalean.
Ekitaldiaren inaugurazio ofiziala 9:00etan izango da, Jon Iraola Eibarko alkatea, eta Ana Telleria Gobernu Irekiko Ordezkaritzako arduraduna buru direla. Ondoren, Óscar Cortés Abad Madrilgo Udaleko komunikazio digitaleko koordinatzaile eta Juan Carlos Erregea Unibertsitateko irakasleak lehen hitzaldia emango du, “Pandemia osteko komunikazioa: krisi-egoeren plangintza eta kudeaketa” izenarekin. Hitzaldia gaztelaniaz izango da eta 9:15ean hasiko da gutxi gorabehera.
Ordu erdi geroago, 09:45ean, AZK komunikazio-agentziako Malen Illarramendi Beitiak eta Jone Amonarriz Zubeldiak, bezeroen kudeaketan eta marka-irudian adituek, bigarren hitzaldia emango dute, euskaraz, “Marka-irudiaren sorrera, eguneraketa eta kokapena administrazio publikoetan” izenarekin.
Arantxa Hernández Lópezek, web-orrien irisgarritasunean adituak, “Web-orri eta aplikazio instituzionalen sorrera: irisgarritasuna herritar guztientzat” izeneko hitzaldian soluzioak emango ditu webgune irisgarriagoak eta ulergarriagoak egiteko.
Hitzaldia gaztelaniaz izango da eta 10:15ean hasiko da.
Kafea hartzeko eten labur baten ondoren, 11:15ean, Iñaki Gorostiza Esquerdeiro LIN3S-ko Data Analytics-eko bazkide eta zuzendariak hitzaldia emango du gaztelaniaz honako izenburuarekin: “Neurtzea, aztertzea eta erabakiak hartzea online sektore publikoko datuetan oinarrituta”.
Komunikazio instituzionalari eta marketin digitalari buruzko hitzaldien lehen blokearen ondoren, gardentasunaren eta gobernu onaren alorrari ekingo zaio, Gipuzkoako Foru Aldundiko eta Eusko Jaurlaritzako profesionalen eskutik.
Foru Aldunditik, Goizeder Manotas Rueda Gobernantza Departamentuko aholkularia eta Haritz Ugarte Aizpuru Berrikuntza eta Eraldaketa Zerbitzuko burua etorriko dira, gobernu onarekin eta salaketen kanalekin lotutako gaietan duten ikuspegia eta esperientzia ezagutaraztera. Salaketa-kanalek 2/2023 Legean dute oinarria (otsailaren 20koa, arau-hausteei eta ustelkeriaren aurkako borrokari buruzko informazioa ematen duten pertsonak babestea arautzen duena). Hitzaldia euskaraz emango dute eta izena hauxe izango da: “Gobernu ona, zuzentasun-sistema eta salaketen kanala Gipuzkoako Foru Aldundian” eta 11: 45ean hasiko da.
Seigarren eta azken hitzaldia Koldobike Uriarte Ruiz de Eguino Eusko Jaurlaritzako Berrikuntza Publikoko Proiektuen arduradun eta Informazio Publikoaren Sarbiderako Euskal Batzordeko kideak emango du gaztelaniaz, 12:15ean, izenburu hau izango duen solasaldi batekin: “Informazio publikoa eskuratzeko eskubidea: eskaerak izapidetzetik kudeaketarako talde kualifikatuak finkatzeraino. Erronka nagusiak”.
Azkenik, programa amaitzeko, mahai-inguru bat egingo da, non jardunaldiko hizlari guztiek hausnarketa bat egingo duten jardunaldian jasotako ideien eta gaien inguruan, eta etorkizuneko erronken inguruan. Mahai-ingurua eta jardunaldia Oihane Mateos kazetari eta aurkezleak gidatuko du.
- Izena emateko formularioa (OHARRA: izen-emate epea zabalik egongo da 2023ko urriaren 26tik azaroaren 16ra).
