2025-2028 aldirako komunikazioa eta gardentasuna sustatzeko plan berria onartu da

Eibarko Udalak, Alkatetzaren 2025eko ekainaren 20ko Ebazpenaren bidez, 2025-2028 Komunikazio eta Gardentasun Plan berria onartu du, erakundearen barneko eta kanpoko komunikazioa hobetzeko eta udal-gardentasuna bultzatzeko helburu nagusiarekin. Onartutako dokumentuak jarraipena ematen die aurreko plan eta estrategiei:  2016-2019 Komunikazio Estrategia, erakundeak 2017an egindako Gardentasun Estrategia eta  2021-2023 Komunikazio eta Gardentasun Plana.

Dokumentu berrian proposatutako jardueren eremua, barrura begira, Eibarko Udala bera da (udal arloak, zerbitzuak eta unitateak, Udalbatzaren talde politikoak eta sindikatuak), eta kanpora begira Eibarko herritarrak eta gizartea, oro har, bai eta komunikabideak ere. 

Jon Iraola Eibarko alkatearen hitzetan, “2025-2028 Komunikazio eta Gardentasun Planak erakusten du Eibarko Udalak konpromiso instituzional argia duela gardentasunean, kontu-ematean eta herritarrekiko komunikazioan hobetzeko. Plan honek komunikazio publikorako eta informazioa zabaltzeko estrategiak formalizatu eta egituratu nahi ditu, norabide argi eta planifikatu batekin, gardentasun-politikak datozen urteetan modu koherentean ezarriko direla bermatzeko”.  

Iraolak gaineratu duenez, "Plan berria herritar guztientzako informazioaren eskuragarritasuna hobetzera bideratuta dago, gobernu ireki batentzat erabakigarria baita hori. Era berean, Planak informazio publikoaren zabalkundean gardentasuna ez ezik, funtsezko beste alderdi batzuk ere biltzen ditu, hala nola barne-komunikazioaren kudeaketa".

Bestalde, Vanesa Hortas Gobernu Irekiaren Ordezkaritzako zinegotzi arduradunak honako hau ziurtatu du: "Plan honek udal-arlo eta -zerbitzuen arteko koordinazioa erraztu nahi du, bai eta herritarrek eta komunikabideek Udalarekin duten harremanari buruz duten pertzepzioa hobetu ere”.

Komunikazioaren diagnostikoa

Plan hau Udaleko giza baliabideekin egin da, eta, lehenik, azterketa edota diagnostiko orokor bat jasotzen du, zehazteko zein den Eibarko Udalaren egoera komunikazioaren eta gardentasunaren alorrean.  Azterketa hori egiteko, metodologia kualitatibo bat aplikatu zen, eta erabilitako tekniken artean hauexek aipatu behar dira: focus group edo eztabaida-taldea, elkarrizketa, behaketa parte-hartzailea, inkesta, dokumentuen berrikusketa (udal-plan eta programak, memoriak…) eta Udalaren komunikazio-kanalak, bai online bai offline (udal-webguneak eta -mikrositeak, sare sozialak, buletinak edo newsletter delakoak, mugikorrerako aplikazioak, aldizkariak eta liburuxkak...).  

Diagnostiko-fasea 2024ko azarotik abendura bitartean egin zen. Guztira, bi focus group edo eztabaida-talde antolatu ziren, zeinetan Eibarko Udaleko arlo, zerbitzu eta unitateetako hainbat arduradun politikok eta teknikarik parte hartu zuten.

Halaber, 252 inkesta jaso ziren udal-komunikazioaren eta -gardentasunaren egoera baloratzeko: haietako 93 Udaleko langileek, talde politikoek eta sindikatuek bete zituzten, eta 159 Eibarko herritarrek.

Erakundeak komunikazioaren eta gardentasunaren arloan duen egoera aztertu ondoren, hauexek dira  hautemandako zailtasun nagusiak: barne-komunikazioaren koordinazio eta kudeaketa urria; herritarren pertzepzio moderatua erakunde-komunikazioari eta udal-markaren irudiari buruz; udalaren web-orriaren irisgarritasunaren eta edukien inguruko balorazio moderatua; estrategia moderatua sare sozialetan; Udala ez egotea zenbait kanal edo formatu digitaletan; Udal Gardentasunaren Atariaren erdibideko kalifikazioa, eta informazio publikoaren eskaerei erantzuteko denboran gertatzen den atzerapena; eta Gobernu Irekiaren politika berrien aldeko apustu moderatua.

Egin beharreko ekintzak

Azterketa egin ondoren, plan berrian lau helburu estrategiko zehaztu dira: barrura begira, barne-komunikazioa optimizatzea 2025-2028 aldian, eta identitate eta kohesio instituzionala indartzea; eta, kanpora begira, herritarrekiko komunikazio instituzionala hobetzea, eta udal-gardentasuna indartzea, informazio publikorako sarbide arina eta eguneratua bermatuz.

Helburu horiek betetzeko, hobekuntza-ekintza batzuk egingo dira, udal-arlo eta -zerbitzuen arteko harremanak zein Udalak herritarrekin dituen harremanak errazteko.

Barrura begira, sailen arteko koordinazioa sustatuko da zeharkako lantaldeekin; barne-komunikazioko tresnak hobetuko dira, hala nola udal-intraneta; antolaketa-kohesioa eta -kultura erraztuko duten gidak, eskuliburuak eta protokoloak prestatu eta eguneratuko dira, eta, besteak beste, krisi-komunikazioarekin lotutako gaiak landuko dira.

Bestalde, kanpo-komunikazioa hobetzeko, gai hauek landuko dira: udalaren webgunea eta tresna digitalak; estrategia digitala eta sare sozialak; irisgarritasun digitala; gardentasun aktiboa eta pasiboa; gardentasunaren eta berrikuntza instituzionalaren kultura sustatzea; eta plangintza mediatikoa eta komunikabideekiko harremanak.

Plan berrian definitutako ekintzen betetze-maila aztertu eta baloratzeko, ebaluazio- eta jarraipen-metodo batzuk gauzatuko dira (eragina prentsan eta web 2.0n, inkestak, elkarrizketa sakonak, eztabaida-taldeak...), bai eta helburu kuantifikagarrien berrikuspena ere, aldez aurretik ezarritako adierazle batzuen bidez.

Komunikazioan eta gardentasunean egindako ekintzak

Kanpo-komunikazioa hobetzeko azken urteotan egindako proiektu nagusienen artean, honako hauek azpimarratu behar dira: Eibarko Udalaren Identitate Bisual Korporatiboaren proiektu berria; www.eibar.eus udal-webgunearen edukiak birdiseinatzea; eta sare sozialen 2022ko plana, besteak beste.

Gardentasunaren arloan, ekintza hauek nabarmentzen dira: 2021ean ELoGE Bikaintasun Zigilua lortu izana, eta 2025ean akzesita edo aitortza Audaz Aitorpenetan; 2021ean eta 2023an bi jardunaldi antolatu izana administrazio publikoetako komunikazioaz eta gardentasunaz; edo Dyntra plataformak EAEko udal gardenenei buruz egiten duen rankingean Udalaren posizio onari eutsi izana (4. tokia).