Eibarko Udalaren aplikazio berriak 300 deskarga baino gehiago izan ditu bere lehen hilabetean
App berria App Storen eta Google Play Storen dago eskuragarri.
Google Play Storen 247 deskarga egin dira guztira, eta Apple Storen, berriz, 113. App berriaren bidez, erabiltzaileek bide publikoko gorabeherei buruzko kexak, iradokizunak edo abisuak bidal ditzakete udalera, eta denbora errealean informazioa jasotzeko aukera dute interesatzen zaizkien gaiei buruz, berehalako alerta-sistema baten bidez.
Eibarko Udalak joan den otsailean aurkeztu zuen aplikazio mugikor berriak 360 deskarga izan ditu guztira, orain arte, erabiltzaileek eginak. Aplikazioa euskaraz eta gaztelaniaz dago eskuragarri, eta 250 deskarga inguru ditu Google Play Storen, eta beste 113 deskarga, zehazki, App Storen (iOS).
Gainera, aplikazioa aurtengo otsailean argitaratu zenetik, 447 saio edo bisita zenbatu dira, 31 erabiltzailerekin batez beste, app-a deskargatu duten gailuetatik, Apple Store bidez. Bestalde, aurreko ostiralean, martxoak 27, Androiden erabiltzaile aktibo gehien erregistratu ziren, 221 izatera iritsiz. Orain arte lortutako datuak urriak dira aplikazio berriari eta herritarrek ematen dioten erabilerari buruzko benetako azterketa egiteko, baina informazio gehiago izan ahala, informazio zehatza emango da, udalaren www.eibar.eus webgunearen bidez.
Ana Telleria Gobernua Zabalik Ordezkaritzako zinegotzi arduradunaren hitzetan, “herritarren aldetik, app-a jasotzen ari den harrera ona dela eta, komunikazio-bide berriak ezartzearen aldeko apustua egiten jarraitzen dugu, gero eta jende gehiagorengana iristeko.”
Ildo horretan, Telleriak dioenez, "Aplikazio hau funtsezko tresna da herritarrei gure udalerrian gertatzen den guztiaren berri ematen jarraitzeko, are gehiago osasun-krisiaren garai honetan, pertsonek informazio eguneratua eta denbora errealean eskatzen baitute gertatzen ari den guztiaren inguruan. Beraz, Eibarko Udalak app hori deskargatzera animatzen ditu herritarrak, gure hiriko gaurkotasun informatiboa gertutik jarraitzeko eta hurbilen duten erakundearekin, Udalarekin, harreman zuzena izateko ".
Herritarrek, interesatzen zaizkien gaiei buruzko informazioa jasotzeaz gain, berehalako alerta-sistema baten bidez, bide publikoko gorabeherei buruzko kexak, iradokizunak edo abisuak bidal diezazkiokete Udalari. Horregatik guztiagatik, Eibarko Udalak aplikazio hau erabiltzen jarraituko du udal-arlo, -zerbitzu eta -unitateen interes bereziko gai guztien berri emateko, eta, egun hauetan, bereziki, herritarrak COVID-19 koronabirusaren krisiak gure hirian eragiten dituen ondorioei buruz informatuta mantentzeko.
Aplikazioa, komunikazio-kanal berri gisa
Aplikazio berria euskaraz zein gaztelaniaz konfiguratu daiteke, "Ezarpenak" blokearen bidez, eta hainbat atal interesgarrik osatzen dute. Menu nagusian daude eskuragarri, aplikazioaren beheko aldean honako atal hauek: Albisteak; Agenda; Kexak eta iradokizunak eta Udala.
Tresna hau Eibarko Udalak herritarrekin hitz egiteko eskaintzen duen beste bide bat da, eta eibartarrei gai nagusien hobekuntzan aktiboki parte hartzeko aukera ematen die. Horrela, aplikazio berria orain arte ezarritako beste sarbide edo bide batzuei gehitzen zaie, bizilagunek kexa, iradokizun edota erreklamazio bat egin ahal izan dezaten, bai Udalaren www.eibar.eus webgunearen bidez ("Abisuak, kexak eta iradokizunak" atala, "Tramiteak eta zerbitzuak" blokearen barruan), bai Pegoran (Herritarrentzako zerbitzu-bulegoa, 010/943708400 telefonoan).