Liburu eta Disko Azoka urriaren 30etik azaroaren 8ra izango da

Udal ordezkariak eta langileak Liburu eta Disko Azokaren inaugurazioan.

2020/10/30

Helburua irakurketa sustatzea da. Azokan hainbat salmenta-postu jarriko dituzte, eta azken argitalpenak eskainiko dituzte, euskaraz zein gaztelaniaz. Azoka irekita egongo da 11:00etatik 13:30era eta 16:00etatik 20:00etara astelehenetik ostiralera, eta 11:00etatik 14:00etara eta 17:00etatik 20:30era larunbat eta igandeetan.

Aurten ere, Eibarren, Liburu eta Disko Azoka egingo da gaur, urriak 30, hasi eta hilaren 8ra arte, Unzaga plazan. Astegunetan, azoka zabalik egongo da 11:00etatik 13:30era eta 16:00etatik 20:00etara, eta 11:00etatik 14:00etara eta 17:00etatik 20: 30era, asteburuetan. Era berean, herritarrei gogorarazten zaie, COVID-19ren pandemia dela eta, derrigorrezkoa izango dela azokan ere maskara erabiltzea, baita standetan emango den gel hidroalkoholikoa ere, eta gutxienez 1,5 metroko segurtasun-distantzia mantendu beharko dela.

Aurten jarritako postu edo stand ezberdinek azken argitalpen berriak erakutsiko dituzte, bai euskaraz eta baita gaztelaniaz ere. Helburu nagusia da herritarren artean irakurzaletasuna sustatzea. Ohi bezala, erosleek liburuak eta diskoak % 10eko deskontuarekin erosi ahal izango dituzte.

Besteak beste, Elkar, Erein, Txalaparta eta Ttarttalo argitaletxeak izango dira. Eta, banatzaileak aparte, liburu-denda bat eta udalaren stand-a egongo dira.

Bestalde, aurreko urteetan bezala, hainbat idazle izango dira bertan, besteak beste, Anton Arriola, Miren Palacios, Javier Sagastiberri eta Inma Roiz.

Besteak beste, honako liburu hauek aurki daitezke azokan: euskaraz, "Aitaren Etxea" (Karmele Jaio); "Kontrako eztarritik" (Uxue Alberdi); "Ene baitan bizi da" (Maddi Ane Txoperena); eta gaztelaniaz, "La Editorial" (Toti Martínez de Lezea); "El diario de Josep Barath" (Anton Arriola); "Solitude" (Juan Lekue); "Las tinieblas y el alba" (Ken Follet); "Línea de fuego" (Arturo Pérez Reverte); eta "La buena suerte" (Rosa Montero).

Liburutegiko datuak

Bestalde, Juan San Martin Liburutegitik jakinarazi dutenez, 2020an gehien mailegatu diren euskarazko liburuak hauek izan dira: Aitaren Etxea (Karmele Jaio); Atzerrian (Nerea Balda San Juan); Erbesteko elurra (Felipe Juaristi); Amaren eskuak (Karmele Jaio); eta Fakirraren ahotsa (Harkaitz Cano). Gaztelaniazko maileguei dagokienez, honako hauek nabarmentzen dira: Reina roja (Juan Gómez Jurado); Ajuste de cuentas (John Grisham); Loba negra (Juan Gómez Jurado); La mejor madre del mundo (Nuria Labari); eta Snap (Belinda Bauer).

Era berean, udal liburutegitik gogorarazi dute irakurketa talde ezberdinak daudela -helduen eta adin txikikoen artean- irakurketa sustatzeko helburu nagusiarekin. Helduen artean bi talde daude: Harixa emoten (euskarazko irakurle taldea) eta gaztelaniazko irakurketa kluba. Adin txikikoak, berriz, honako talde hauetan sartzen dira: Azalerako ipuinak (hiru talde, 1 eta 3 urte bitarteko haurrekin), Liburuen poltsa (hiru talde, 4 eta 7 urte bitarteko haurrekin) eta Paperezko hegoak (bi talde, 8 eta 12 urte bitartekoekin).