Liburu eta Disko Azoka azaroaren 10etik 19ra izango da Untzaga plazan

Liburu eta Disko Azokaren aurkezpeneko irudia.

2023/11/10

Helburua, aurten ere, irakurketa sustatzea da. Horretarako, 14 stand jarri dira, azken argitalpen-nobedadeak eskaintzeko, euskaraz zein gaztelaniaz, baita aukerako liburuak ere. Azoka zabalik egongo da 11:00etatik 14:00etara eta 17:00etatik 20:30era astelehenetik ostiralera, eta 12:00etatik 14:00etara eta 17:30etik 20:30era larunbat eta igandeetan.

Liburu eta Disko Azoka izango da aurten ere, gaur ostirala, azaroak 10, hasi eta hilaren 19ra arte. Untzagako plazan jarritako postuak 11:00etatik 14:00etara eta 17:00etatik 20:30era egongo dira zabalik, astelehenetik ostiralera, eta 12:00etatik 14:00etara eta 17:30etik 20:30era, asteburuetan.

Aurten ere jarri diren postu edo stand ezberdinek azken argitalpen berriak erakutsiko dituzte, bai euskaraz eta baita gaztelaniaz ere. Helburu nagusia da herritarren artean irakurketa sustatzea.

Besteak beste, Jakinbide, Erein, Viento Norte, El Gallo de Oro edo Haritza argitaletxeak izango dira. Eta, banatzaileak aparte, liburu-dendak eta udalaren stand-a egongo dira.

Bestalde, aurreko urteetan bezala, hainbat idazle izango dira liburu-sinaduratan, besteak beste, Javier Sagastiberri (aurreko urtean ere egon zen), Elena Peña, Marisol Artica, Beñat Arginzoniz eta María de Azeredo.

Besteak beste, honako liburu hauek aurki daitezke azokan: euskaraz, "Etxeko urak" (Leire Bilbao), "Hildako haurra" (Gotzon Barandiaran) eta "Otsoa etorriko da" (Iñaki Irasizabal); eta gaztelaniaz, "El Maizal" (Toti Martínez de Lezea) edo "Material de construcción" (Eider Rodríguez).

Azokan zehar "Emakumea protagonista, Euskal Idazle emakumeak" erakusketa ere izango da.

Liburutegiko datuak

Bestalde, Juan San Martin Liburutegitik jakinarazi dutenez, 2023an gehien mailegatu diren euskarazko liburuak hauek izan dira: Eraikuntzarako materiala (Eider Rodríguez); Ilunpeko zelataria (Alberto Ladrón Arana); Etxe berdea (Andoni Agirrezabala); Nire minaren etxean (Iñigo Dierez); eta Gari eta goroldiozko (Anari). Gaztelaniazko maileguei dagokienez, honako hauek nabarmentzen dira: Esperando al diluvio (Dolores Redondo); El final de la fiesta (Nagore Suárez); La camarera (Nita Prose); Cuando era divertido (Eloy Moreno); eta No mires al pasado (Patricia Jiménez González).

Era berean, udal liburutegitik gogorarazi dute irakurketa talde ezberdinak daudela -helduen eta adin txikikoen artean- irakurketa sustatzeko helburu nagusiarekin. Helduen artean bi talde daude: Harixa emoten (euskarazko irakurle taldea), Ainhoa Aldazabal eibartarrak dinamizatuta, eta gaztelaniazko irakurketa kluba, Peru Magdalenak gidatua.

Adin txikikoak, berriz, honako talde hauetan sartzen dira: Azalerako ipuinak (3 talde, 1 eta 3 urte bitarteko haurrekin), Liburuen poltsa (3 talde, 4 eta 7 urte bitarteko haurrekin) eta Paperezko hegoak (bi talde, 8 eta 12 urte bitartekoekin). Azken talde honetan parte hartzeko aukera badago oraindik.

Azkenik, Udal Liburutegitik aurreratu duenez, 2023an, guztira 101.178 bisita egin dira ikasketa- eta irakurketa-gune honetara, eta maileguak 26.939 izan dira.