Izengabeak lehiaketa bueltan da ostiral eta larunbat honetan Untzagan, Debabarreneko musika-talentu gazte onenarekin

Ostiral eta larunbat honetan, Izengabeak musika-taldeen lehiaketaren bigarren edizioko zuzeneko emanaldien fasea hartzeko prestatzen ari da Eibar. Udalak eta Eibarko Gazte Musika Elkarteak (AMJE) bultzatutako ekimen honek Eibarko eta Debabarrena eskualdeko gazte talentua babestea eta ikusaraztea du helburu.

Deialdiak erantzun ona izan du, zazpi taldek eman baitute izena bigarren edizio honetan. Aurretiko hautaketa-fasearen ondoren, talde parte-hartzaileek beren proposamen musikalak zuzenean aurkezteko aukera izango dute publikoaren eta epaimahaiaren aurrean.

Untzagan hasiko dira emanaldiak bi egunetan, 19:30ean, eta aukeratutako taldeek euren proposamenak eskainiko dituzte, musika-estilo askotarikoak. Izengabeak zabalik dago oinarrietan ezarritako baldintzak betetzen dituen edozein estilotako taldeentzat, besteak beste, kideen %50 Debabarrenean bizi eta bi disko baino gehiago argitaratuta ez izatea.

Lehiaketak sari garrantzitsuak banatuko ditu parte hartzen duten taldeen artean. Lehen sariak 2.000 euro eta 50 estudioko ordu izango ditu; bigarrenak, berriz, 1.000 euro eta 50 estudioko ordu. Gainera, 500 euroko bi sari berezi emango dira: euskarazko kanturik onenarentzat eta Eibarko talderik onenarentzat. Irabazleen izenak irailaren 19ko itxiera-ekitaldian emango dira ezagutzera.

Eibarko alkate Jon Iraolak bigarren edizioak izandako harrera ona azpimarratu du: “Izengabeak lehiaketak erakusten du Eibarren eta Debabarrenean talentu handiko gazteak  ditugula, lan egiteko gogoz daudenak. Zazpi taldek parte hartzera animatu izana oso albiste ona da eta gure eskualdean musika-eszena gazte eta aktibo bat dagoela erakusten du. Udaletik espazioak sortzen jarraitu nahi dugu, beren lana erakutsi, esperientziak partekatu eta musika eginez gozatzeko aukera izan dezaten”.

Bestalde, Andoni Zabala Kultura zinegotziak adierazi duenez, “bigarren edizio honek aukera ematen digu Izengabeak Debabarreneko talde gazteen topaleku gisa finkatzen jarraitzeko. Oso proposamen ezberdinak ditugu eta ziur gaude ostiral eta larunbat honetako emanaldiek aukera emango diotela publikoari talentu berriak ezagutu  eta zuzeneko musikaz gozatzeko”.

Eibarko Udalak eta AMJEk Untzagara gerturatzeko gonbita egiten diete herritarrei ostiral eta larunbat honetan, irailaren 18an eta 19an, 19:30etik aurrera, parte hartuko duten taldeen emanaldiez gozatzeko eta Eibarko eta Debabarreneko musikari gazteei babesa emateko.