Go!azen 12.0 musikalak emozioz eta musikaz beteko du Coliseo antzokia larunbatean, hilak 24
Bigarren aukerei buruzko istorio honek publiko gaztearekin konektatzen du. Urtarrilaren 24eko arratsalderako azken sarrerak salgai.
Coliseo antzokiak Go!azen 12.0 proposamen eszeniko arrakastatsua hartuko du larunbat honetan. Ikuskizunak publikoa liluratzea lortu du, musikari, emozioei eta egungo gazteen errealitatearekin lotutako istorio bati esker. Bi saio egingo dira, bata 17:00etan eta bestea 19:00etan. Gazteen erantzuna oso ona izaten ari da, eta jada oso sarrera gutxi geratzen dira.
Istorioa Basakabin gertatzen da, non Maitanek “bigarren aukeren” kanpamentu bihurtu duen udalekua. Garazirekiko komunikazio faltak markatuko du uda hasiera, eta Basakabi arazoak dituzten gazteez beteko da.
Etorri diren gazte berriek iskanbilak sortuko dituzte, eta, gainera, Kuxkuxero izeneko pertsona batek ikasle guztien inguruko informazioa zabalduko du sare sozialetan, arazoak eta mesfidantza sorraraziz. Musikalak hainbat gai lantzen ditu, hala nola maitasuna, anai-arreben arteko gorrotoa, mendekua eta sare sozialen inpaktua; horrez gain, abesti berriek erritmoa eta freskotasuna ematen diote narrazioari.
Gainera, Jon Alonso aktore eibartarrak parte hartzen du ikuskizunaren bi saioetan. Eibarko ikusleek bereziki baloratu dute Alonso bertan egotea.
Jon Iraola Eibarko alkateak obraren balio kulturala azpimarratu du: “Go!azen 12.0 gazteekin oso ondo konektatzen duen ikuskizun bat da, antzerki musikala tresna gisa erabiltzen duena balioak transmititu eta gogoeta eragiteko”.
Andoni Zabala Kultura zinegotziak, bestalde, hauxe azpimarratu du: “Emanaldi honek erakusten du Coliseo antzokia espazio dinamiko bat dela, gaur egungo eta gertuko ekoizpenak eskaintzen dituena. Oso aukera ona da antzerkia familian ikusteko”.
Gogoan izan behar da Jon Alonsok duela ia urtebete urrats garrantzitsu bat eman zuela bere ibilbide musikalean Atea Irekiz proiektua bakarka aurkeztuz, 2025eko apirilaren 4an Colisoan egindako kontzertuan, non ibilbide artistikoan giltzarri izan ziren pertsonak izan zituen lagun.
Sarreren prezio arrunta 12 eurokoa izango da, eta Coliseoko laguna txartelarekin 8,5 eurokoa. Publikoaren erantzuna oso ona izaten ari da eta sarrera gutxi geratzen dira dagoeneko musika-proposamen intentso hau ikusi ahal izateko.
