Bakailao lehiaketa ezberdinek eta San Andres azokak osatzen dute, besteak beste, azaroko kultur agenda

2019/11/13

Igande honetan, azaroak 17, 'Bacalaos Alkorta' Pintxoen Lehiaketaren III. edizioa izango da, udaletxe barruko patioan, 12: 30etik aurrera, eta baita XVI. Eskola arteko bakailao lehiaketa ere, udaletxeko arkupeetan, 10:30ean. Bestalde, azaroaren 24an, San Andres XXVII. Bakailao Lehiaketa egingo da Untzagan, 11:00etan. Era berean, azaroaren 30ean, San Andres eguneko azoka eta abere erakusketa izango dira; bertan, 72 ekoizlek hartuko dute parte.

Azaroko agenda kulturala jarduera ugariz beteta dator, baina nabarmentzekoak dira, batez ere, San Andres Azoka tradizionala, hilaren 30ean izango dena, eta bakailao lehiaketak, gure hirian hilaren 17an eta 24an antolatuko direnak. Hala jakinarazi dute gaur goizean prentsaurrekoan Patxi Lejardi Kultura zinegotziak, Jose Luis Gonzalez Saileko teknikariak, Iban Alkorta Bacalaos Alkortako arduradunak eta Mireia Alonso sukaldari eibartarrak.

San Andres Nekazaritza Azoka

2019ko San Andres Azoka azaroaren 30ean, larunbata, ospatuko da Eibarren eta guztira 72 ekoizle bilduko dira; 34 bizkaitar, 24 gipuzkoar, 11 arabar eta Nafarroako beste 3. Aurten ere azoka Txaltxa Zelai eta Untzaga artean banatuta egongo da. Bertan, Eibarko bi baserri izango dira: Loixola baserria, barazkiekin eta Sosola, ogiarekin.

Azokan salgai jarriko diren produktuen zerrenda eta jatorria honako hau da: barazkiak (17); frutak (3); ogia (21); gazta (19); Debabarreneko gaztak (2); eztia (6); txakolina (1); eta lorak (3). Sariak honako hauek izango dira: 1. saria, 180 euro (barazkiak, frutak, eztia, ardi gazta eta ogia) eta 2. saria 120 euro produktu berdinentzat. Aipatutako sariez gain, aurkezpen onenarentzat bi sari egongo dira: lehenengoa, 150 eurokoa eta bigarrena, 90 eurokoa. Eibarko baserrien artean, onenari 90 euroko saria emango zaio. Amaitzeko, parte hartzaileen artean epaimahaiak 80 euroko aipamenak bana ditzake.

San Andres azokan salgai jarriko diren produktuez gain, urtero legez, abereen erakusketa ere izango da; aurten ere, Fermín Calbeton eta Barria Plaza kaleen artean kokatuko da. Eskualdeko 8 baserrik ekarriko dituzte animaliak. Hala, erakusketa horretan ikusi ahal izango diren animaliak honako hauek dira: behiak, idiak, zaldiak, astoak, ardiak, ahuntzak, txerriak, hegaztiak eta untziak. Gainera, erakusketan parte hartuko duten baserriak honako hauek izango dira: Sumendixa Goikua, Loixola, Mandiola Gainekua, Aritxulueta, Iturrua, Orbe, Mendigoitxi eta Arimendi.

'Bacalaos Alkorta' Pintxoen Lehiaketaren III. edizioa

Urteroko azoka baino egun batzuk lehenago, datorren igandean, hilak 17, Eibarko udaletxe barruko patioan, 'Bacalaos Alkorta' Pintxoen Lehiaketaren III. edizioa izango da, 12:30etik aurrera. Ekitaldia "showcooking" bat izango da, pintxoak nola egiten diren zuzenean ikusi nahi duten herritar guztiei irekia.

Lehiaketan honako txapelketa hauetan 2019an garaile izan diren establezimenduek hartuko dute parte: "Gran Sol", Hondarribikoa (Gipuzkoako txapelduna); "Kiska", Ermukoa (Bizkaiko txapelduna); "Waska jatetxea", Gasteizkoa (Arabako txapelduna); "Baserri Berri" (Nafarroako txapelduna); "Getari" (Iparraldeko txapelduna); "Danako", Irungoa (Euskal Herriko txapelduna); "Viento sur" (Elgoibarko txapelduna); "Giroa" (Ermuko txapelduna); eta "Baratze Gourmet" (Eibarko txapelduna).

Ramon Roteta, Josu Mugerza (Elgoibarko "Belaustegi" Jatetxea), Juan Carlos Ayerbe Goitia, Iñigo Kortabitarte (Durangoko Kobika jatetxea), Mitxel Suarez Suso (Borda Berri Araba jatetxea) eta Mireia Alonsok osatuko dute epaimahai ofiziala.

Aurtengo edizioan honako sari hauek banatuko dira: "Pintxo onenaren saria"; "Bakailao tratamendu onenaren saria"; "Km0 produktuaren presentzia onenaren saria"; "Tokiko pintxo onenaren saria"; eta "Finalista guztientzako saria".

Iazko irabazlea Iruñako "Mercado" izeneko jatetxea izan zen. Lehiaketa Eibarko Udalak, "Bakailaoak Alkorta" enpresak eta Mireia Alonso Perez gastronomoak antolatu dute. Halaber, Solera Eibarresa, Meka-Hotel, Esther Galarza, Igartza, Comercial Zabala, Gamarrako Ostalaritza Eskola, Debabarrena Gazta eta Eibarko "Oinarrizko Lanbide Heziketa Institutua" bezalako erakundeen laguntza du.

Beste bakailao lehiaketa batzuk

Lehiaketa horretaz gainera, datorren igandean, azaroaren 17an,  XVI. Eskola arteko bakailao lehiaketa izango da. Oraingo honetan, Eibar BHI, Aldatze eta La Salle Azitain ikastetxeetako Derrigorrezko Bigarren Hezkuntzako ikasleak elkartuko dira udaletxeko arkupeetan, 10:30etik 11:30era. Oraingoan, ospe handiko sukaldariek osatuko dute epaimahaia. DBHko 1., 2., 3. eta 4. mailako ikasleek garaikur bat jasoko dute sari gisa, eta ikastetxe onenari garaikur bat banatuko zaio.

Bestalde, azaroaren 24an, San Andres XXVII. Bakailao Lehiaketa egingo da Untzaga plazan, 11:00etan. Bertan, Eibarren egoitza duten elkarte, eskualdeko etxe eta koadrilek parte hartu ahal izango dute. Lehiaketa horretan parte hartzeko izen-emate epea azaroaren 4an hasi zen, eta hilaren 14ra arte egongo da zabalik. Izen-emateak modu elektronikoan egin ahal izango dira, www.eibar.eus webgunearen bidez, eta aurrez aurre Pegoran, herritarrei zerbitzua emateko bulegoan.

Oraingo honetan, hiru sari banatuko dituzte. Irabazleak garaikurra, txapela, 300 euro eta Alkorta Anaiak, Vinos Solera Eibarresa eta Sociedad Cooperativa Virgen de la Estrella (Maimona) produktuen sorta eskuratuko ditu. Bigarren sariak garaikur bat, 200 euro, eta Alkorta Anaiak, Vinos Solera Eibarresa eta Sociedad Cooperativa Virgen de la Estrella (Maimona) enpresen produktuen sorta bat ditu. Hirugarren eta azken saria 100 eurokoa izango da, eta Vinos Solera Eibarresa eta Sociedad Cooperativa Virgen de la Estrella (Maimona) enpresen produktuen beste sorta bat.

Bakailao lehiaketa ezberdinek eta San Andres azokak osatzen dute, besteak beste, azaroko kultur agenda

Bakailao lehiaketen eta San Andres Azokaren aurkezpena.