"Auzoak Martxan"
Ekimena sei saio parte-hartzaileren bidez garatuko da, zehaztutako eremu bakoitzeko bat: Erdigunea-Legarre, Errebal-Jardiñeta, Amaña, Ipurua, Urki eta Urkizu. Bilerek formatu dinamikoa eta elkarlanekoa izango dute, eta Manahmana enpresa espezializatuak antolatu eta dinamizatuko ditu.
Udalak guztira 420.000 euro bideratuko ditu ekimen honetara —parte hartzen duten sei auzo edo eremu bakoitzeko 70.000 euro—, parte-hartze prozesutik sortzen diren eta teknikoki, ekonomikoki eta juridikoki bideragarriak diren jarduerak eta proiektuak finantzatzeko.
Gainera, saioek eremu bakoitzerako interesgarriak diren hainbat gai jorratzeko aukera emango dute, parte hartzen duten pertsonen lehentasunen eta ekarpenen arabera. Besteak beste, arlo hauek landu ahal izango dira: mugikortasuna eta irisgarritasuna, herritarren bizikidetza, Udalarekiko komunikazioa, haurrak eta gazteak, ekonomia, kirola, prozedurak eta izapideak, kultura, euskara, hirigintza eta ingurumena, segurtasuna eta trafikoa, eta berdintasuna.
Lan kolaboratiboan oinarritutako metodologia
Saioei hasiera emateko, Manahmanako talde dinamizatzaileak sarrera labur bat egingo du. Horrez gain, programaren helburuak azaldu, saio bakoitzean parte hartuko duten udal-teknikariak aurkeztu eta haiek beteko dituzten funtzioen berri emango du.
Ondoren, dinamika labur bat egingo da parte-hartzaileek elkar ezagutu dezaten, eta auzo bakoitzaren erronkei buruzko lanari emango zaio bide.
Lehen fasean, parte-hartzaile bakoitzak bakarka identifikatu ahal izango ditu, ohar itsasgarrien bidez, ondo funtzionatzen duten eta positiboki baloratzen diren auzoko alderdiak eta hobetu behar direla uste dutenak. Ideiak taldeka partekatu ondoren, gai nagusiak aukeratuko dira. Ekarpen guztiak jasota, parte-hartzaileek garrantzitsuenak iruditzen zaizkienak lehenetsi ahal izango dituzte, landu beharreko hiru erronka nagusi identifikatzeko.
Hurrengo fasean proiektuak eta proposamenak garatuko dira. Identifikatutako erronka bakoitza mahai desberdinetan landuko da, eta hainbat parte-hartze erronda egingo dira, jendeak bere ideiak eman eta proposamenak aberasteko aukera izan dezan. Azkenik, mahai bakoitzak txantiloi bat beteko du, zeinean proposamenaren ezaugarriak jaso eta zehaztuko diren, ondoren udal zerbitzu teknikoek proposamenaren bideragarritasuna aztertu ahal izateko.
Saioak amaitzeko, parte-hartzaileei eskerrak emateko eta ekitaldiari amaiera emateko tarte bat egongo da, eta, horrela, saioetan egindako ekarpenei balioa emango zaie.
Sei saio, urriaren 14tik 29ra
Lan-saioak honako toki eta ordutegi hauetan egingo dira:
- Legarre zentroa: urriaren 14an, 18:30ean, Errebal eraikinean.
- Errebal-Jardiñeta: urriaren 21ean, 18:30ean, Errebal eraikinean.
- Amaña: urriaren 22an, 18:00etan, Amañako ikastetxean.
- Ipurua: urriaren 27an, 18:00etan, Ipuruako merkatu plaza zaharreko eraikinean.
- Urki urriaren 28an, 18:00etan, Urki Arrateko Andra Mari ikastetxean.
- Urkizu: urriaren 29an, 18:00etan, Urkizuko ikastetxean.
Aipatutako guneetako bakoitzean bizi diren pertsonek har dezakete parte. Saioen antolakuntza errazteko, aldez aurretik izena eman behar da urriaren 7a baino lehen, helbide honetan dagoen formularioa betez: https://formularioak.eibar.eus/eu/auzoakmartxan. Plazak mugatuak izango dira.
Formularioan bertan, parte-hartzaileek beren eremurako lehentasunezkotzat jotzen dituzten gai interesgarriak adierazi ahal izango dituzte, eta informazio hori kontuan hartuko da saioetako mahaien lana bideratzeko.
Herritarren proposamenetatik udal azterketara eta azken bozketara
Bilkuretan jasotako ekarpenek ez dute automatikoki ekarriko proposamenak gauzatzea. Parte-hartze prozesua amaitutakoan, lehenetsitako proposamenak dagozkien udal zerbitzu teknikoetara eramango dira, haien bideragarritasun teknikoa, ekonomikoa eta juridikoa aztertzeko.
Horrela, prozesuak aukera emango du ezagutzeko zer proposamen gauzatu daitezkeen, zeintzuek behar dituzten aldaketa edo baldintza jakin batzuk eta zeintzuk ez diren bideragarriak, kasu bakoitzean arrazoiak azalduz. Azterketa hori egin ondoren, bideragarriak diren proposamenak online bozkatzeko azken fasera pasako dira, eta, fase horretan, auzotarrek lehentasuna eman ahal izango diete beren auzoarentzat garrantzitsuenak diren jarduerei.
Bozketaren bidez, azkenean, parte hartzen duten sei eremuetako bakoitzari esleitutako 70.000 euroekin finantzatu daitezkeen jarduerak zehaztu ahal izango dira, prozesurako ezarritako irizpideen arabera eta erabilgarri dagoen aurrekontu-mugara iritsi arte. Udalak prozesuaren emaitzaren eta azkenean egingo diren proposamenen berri emango du ondoren.
«Bultza ezazu zure auzoa / Auzoak Martxan» ekimenarekin, Udalak herritarren parte-hartzea indartu nahi du, eta auzoekiko harreman zuzenago, parte-hartzaileago eta gardenago baterantz aurrera egin, herritarren ezagutza eta proposamenak etorkizuneko udal jardueren diseinuan txertatuz.