Javier Gorosabel II. Astronomia Topaketa izango da Eibarren hilaren 30ean, herriko zientzialaririk bikainenetako baten omenez
Zientzia, dibulgazioa eta kultura batuko dira Coliseoan. Aitortza egingo zaio Javier Gorosabel astrofisiko eibartarraren figurari eta legatuari.
Urtarrilaren 30ean, ostirala, Coliseoan (18:30) Javier Gorosabel II. Astronomia Topaketa egingo da, Espainiako Astronomia Elkarteak (EAE) eta Eibarko Udalak antolatuta. Ekitaldiaren helburu nagusia zientzia, astrofisika, bereziki, herritarrengana gerturatzea da eta, aldi berean, balioan jartzea Javier Gorosabel (1969-2015) astrofisiko eibartarrak egindako lan bikaina.
Gorosabel bere belaunaldiko astronomorik nabarmenetako bat izan zen, eta baita oso figura garrantzitsua ere gamma izpien leherketa kosmikoen ikerketan, funtsezko alorra dena energia altuen astrofisikaren barruan. Haren karreraren azken 15 urteetan zientziari egindako ekarpenak erabakigarriak izan ziren, eta, gaur egun ere, nazioarte mailako astronomia-komunitateak goraipatu egiten ditu. Astrofisikoaren heriotza goiztiarrak eten egin zuen bere karrera zientifiko bikaina, nazioartera begira ere proiekzio handia zuena, zalantzarik gabe.
Jon Iraola Eibarko alkateak topaketa honen garrantzia nabarmendu du: “Javier Gorosabel talentuaren, esfortzuaren eta zientziarekiko konpromisoaren adibide argia da. Eibarren haren memoriak bizirik jarrai dezan nahi dugu, eta, era berean, belaunaldi berrien artean zientzia-bokazioak sustatu”. Iraolak argi utzi du era honetako ekimenek indartu egiten dutela Eibarrek kulturaren eta ezagutzaren alde egiten duen apustua, etorkizunaren oinarri gisa.
Calar Alto teleskopioaren (Javier Gorosabelek bertan egin zuen lan) ardura duen Ana Guijarrok Gorosabelek egindako ikerketa-lana azpimarratzeaz gain, dibulgatzaile gisa izan zuen garrantzia nabarmendu zuen; izan ere, “astronomiaren arlo amateurrean behatokiak sortu zituen haientzat, hiritarren zientzia-proiektuetan ere parte hartu zuen eta ikerketa-lanetan kolaboratzaile izan zen amateurrekin. Astronomiako Espainiako Sozietateak profesionalen eta amateurren arteko elkarlanari aitortza egiteko saria sortu zuenean, ez zen zalantzarik egon: Javier Gorosabel izena izan behar zuen”
Jardunaldia aprobetxatuta, Teknikerrek aurkezpen labur bat egingo du Aztarna Sinoptikoak antzemateko Teleskopio Handiaren garapenean egiten ari diren lanari buruz.
Topaketak zientzia eta kultura uztartzen dituen programazio zabala izango du. Javier Gorosabelen senitartekoak, Iruñeko Planetarioko arduraduna den Iñaki Ordoñez, Maite Arroitajauregi musikaria eta Teknikerreko ordezkariak egongo dira gonbidatuen artean, nork bere disziplinatik, unibertsoari begiratzeko modua ekarriz.
Topaketan zehar, Astronomiako PROAM Lankidetza Saria emango zaio OMEGA Asturiasko Astronomia Elkarteari, eta egiten duen lan dibulgatzailea aitortu. Halaber, zuzeneko konexioa egingo da Calar Altoko Behatokiarekin (Almería).
Andoni Zabala Kultura zinegotziaren hitzetan, “topaketa hau aukera bikaina da astronomia publikoari gerturatzeko eta demostratzeko zientziak ere baduela emozionatzeko gaitasuna, alegia, gure bizitza kulturalaren parte izan daitekeela”. “Eibar harro egoteko moduan dago Gorosabel bezalako figurengatik eta baita dibulgazioa, memoria eta herritarren parte-hartzea uztartzen dituzten ekimenengatik ere”, gehitu du Zabalak.
