Eibarko Artisten Elkarteak erakusketa egingo du Portalean

Portaleko Erakusketa Aretoan, martxoaren 28tik apirilaren 27ra bitartean, Eibarko Artisten Elkartearen urteroko erakusketa egongo da ikusgai. Nabarmendu behar da ekimenean —herriko artezaleentzako ezinbesteko hitzordua— material eta gai ugari erakutsiko direla.

Eibarko Artisten Elkartea duela sei hamarkada sortu zen, eta, denborarekin, herriko kultur jardueraren ezinbesteko pieza izatea lortu du. 1966an sortu zuten pinturarako zaletasuna zuten lau lagunek —José Kareaga, Paulino Larrañaga, Dioni Murua, Alejandro Marful eta Esteban Oroz—, eta orduz geroztik, erakundea etengabe hazi da. Gaur egun 170 bazkide inguru ditu. Haien artean, badira aktibo dauden artistak, eta badira elkartearen lagun izanik parte hartzen eta artisten ekimenak babesten dituztenak ere.

Edizio honetan, berrogeita hamar bat egilek aurkeztuko dituzte beren obrak (bakoitzak bi); guztira ikusgai egongo diren lanen kopurua aurreko urteetakoen beretsua izango da. Beti bezala, pintura izango da nagusi, baina ikusi ahal izango dira, halaber, egurrean egindako lanak, marrazkiak, grabatuak, zeramikak, argazkiak eta eskulturak. Diziplina artistikoen ugaritasun hori da erakusketaren ezaugarrietako bat.

Jon Iraola Eibarko alkateak poza adierazi du ekimenaren jarraitutasunagatik: “Gure herriaren kultur bizitasunaren erakusgarri da. Eibarko Artisten Elkarteak lortu du herriko artearen esentzia bizirik mantentzea; era honetako ekimenak funtsezkoak dira gure herritarren sormena eta talentua sustatzeko.  Seguru nago aurtengo erakusketak jende asko erakarriko duela eta jarraituko duela izaten Eibarko kulturaren hitzordurik inportanteenetako bat".

Bestalde, Andoni Zabala Kultur zinegotziak ekimenak herriarentzat duen garrantzia azpimarratu du: “Artisten Elkartearen urteroko erakusketa gure herriko artisten lanaren eta talentuaren adibide garbia da. Gainera, honelako kultur jarduerek lagundu egiten dute Eibarko kultur bizitza aberasten eta herritarren parte hartzea sustatzen. Erabat babesten dugu elkartearen lana. Halako ekimenek erakusten dute zer garrantzitsua den kultura sustatzen jarraitzea gure herrian”.

Urteroko erakusketa kolektibo honetaz gain, Eibarko Artisten Elkarteak beste ekitaldi garrantzitsu batzuk ere antolatzen ditu, hala nola, urrian egiten den Aire Zabaleko Pintura Lehiaketa. Ekimen hauek indartu egiten dute herrian artea eta kultura sustatzeko elkarteak duen konpromisoa.

Erakusketa zabalik egongo da asteartetik igandera, 18:30etik 20:30era. Astelehenetan aretoa itxita egongo da.