“Tabuen kutxatik oholtzara” bertso saio musikatu solidarioa Eibarren

Izan Inurri elkartearen eskutik, minbizia modu batera edo bestera jasatea tokatu zaienei laguntzeko eta gizartea sentsibilizatzeko, “Tabuen kutxatik oholtzara” bertso saio musikatu solidarioa antolatu du Eibarren Akebaik urriaren 12an, Coliseo Antzokian, 19:00etan.

Minbiziaren errealitatea ezagutarazteko eta normalizatzeko perspektiba feminista eta ahalduntzea oinarri duen euskarazko bertso saioa da. Bertso saio musikatu honetan Amaia Agirre gai jartzailea, Alaia Martin, Ane Zuazubiskar, Oihana Iguaran eta Uxue Alberdi bertsolariak eta Oihana Rodriguez eta Ixak Arruti musikariak izango dira. Horiekin batera Inurri elkartea osatzen duten emakumeak ere izango dira protagonistak.

Sarrerak 3 euroan jarri dira salgai eta hiru modu daude hauek eskuratzeko:

• Kutxabank webgunean (https://labur.eus/IzanInurriEibar)
• Kutxabank: zerbitzu anitzeko kutxa automatikoak
• Aldez aurreko salmenta: Coliseo antzokian, astelehen eta ostiraletan (17:30etik 19:30era)