Portaleak programazio berezi eta zabal batekin ospatuko du bere 30. urteurrena Eibarko erreferente kultural eta sozial gisa

Portaleak hogeita hamar urte betetzen ditu aurten, Eibarko kultura-, hezkuntza- eta gizarte- bizitzaren eragile nagusietako bat bihurtuta. Eraikina 1996ko irailaren 28an ireki zen eta, harrezkero, herritarrentzako, bertako elkarteentzako eta euskal sortzaileentzako erreferentziazko gune bihurtu da. Urtemuga hau ospatzeko, programazio berezia prestatu du udalak, eta, besteak beste, atzera begirako erakusketa handi bat, hitzaldi ziklo bat eta ate irekien hainbat jardunaldi egingo dira.

Ospakizunaren ekitaldi nagusia erakusketa bat izango da, hiru hamarkada hauetan Portalean beren lanak erakutsi dituzten hirurogei artista baino gehiago bilduko dituena. Bakoitzak bere ibilbideko obra adierazgarri bat ekarriko du, helburua baita erakusketa-aretoa euskal sorkuntza artistikoaren hogeita hamar urteko ibilbidearen lekuko izatea. Lanak irailaren 18tik urriaren 25era bitartean egongo dira ikusgai.

Irailaren 24tik urriaren 6rako antolatu den hitzaldi-zikloan, gogoeta egingo da kulturguneek kontsentsurako, berdintasunerako, lankidetzarako, elkargunerako eta garapen jasangarrirako betetzen duten funtzioaz. Gonbidatuen artean Jesus Nuñez, Alfons Martinell, Amaia Gonzalez Llamas eta Jon Sarasua daude.

Gainera, irailaren 25ean eta urriaren 2an ate irekien egunak egingo dira, herritarrek zentroaren eguneroko funtzionamendua eta bertan dauden zerbitzuak ezagutu ditzaten.

Jon Iraola Eibarko alkateak hauxe adierazi du: «Portaleak Eibarrek azken hamarkadetan egin duen inbertsiorik onenetarikoa irudikatzen du. Ez da eraikin bat bakarrik, herriaren  identitatea indartzen lagundu digun espazio bizi bat ere bada, kultura, euskara, prestakuntza eta herritarren parte-hartzea bultzatzen duena. Hogeita hamar urte hauek ospatzea zera da, Portalea Eibarrentzat eta eskualde osoarentzat gaur egun erreferente izatea ahalbidetu duten pertsona, elkarte eta profesional guztien lana aitortzea».

Bestalde, Andoni Zabala Kultura zinegotziak azpimarratu duenez, «urtemuga honetarako diseinatutako programak iraganari harrotasunez begiratu nahi dio, baina baita Portalearen etorkizuna proiektatu ere. Espazio honetatik azken hogeita hamar urteetan igaro diren artista asko bilduko ditu erakusketak, eta hitzaldiek, berriz, kultur ekipamenduek topaketarako, elkarbizitzarako eta sorkuntza partekaturako leku gisa bete behar duten zereginari buruz hausnartzera gonbidatuko dute.  Herritar guztiek ospakizun honetan parte hartzea nahi dugu, Portalea Eibarko historia kolektiboaren parte delako».

Inauguratu zenetik, Portalean hainbat udal zerbitzu egon dira, hala nola Euskaltegia, Juan San Martin Liburutegia, Dibujo Eskola, Zeramika Eskola, Juan Bautista Guisasola Musika Eskola, Armagintzaren Museoa eta hainbat udal sail; horrez gain, herriko dozenaka elkarte eta talderen ohiko egoitza ere bihurtu da.

Gaur egun, ehun pertsona inguruk egiten dute lan eraikinean: irakasleak, teknikariak eta administrariak, tailerretako monitoreak, mantentze-lanetako langileak, garbitzaileak eta ostalariak.

Juan San Martin Liburutegia da jende gehien biltzen duen guneetako bat, 3.778.858 bisita izan baititu ireki zenetik. 1996an 12.000 dokumentu inguru izatetik 90.969  izatera pasatu da, eta bazkideen kopurua, berriz, hazi egin da, hasieran 1.273 zituen, eta gaur egun 13.352.

Erakusketa-aretoa euskal arte plastikoen erreferenteetako bat da: 400 erakusketa inguru egin dira, eta 135.000 bisitari etorri dira bertara. Eskualdeko artista hasi berriek zein lehen mailako figurek erakutsi dituzte beren lanak.

Bestalde, 2007an inauguratu zen Armagintzaren Museoak 6.000 objektu inguru, mila bat arma historiko, 6.000 dokumentu eta ehun bat artelan gordetzen ditu, Eibarren XIV. mendetik gaur egunera arteko bilakaera industriala ezagutzeko aukera ematen dutenak.

Hogeita hamar urte hauetan zehar, Portalean hitzaldiak, erakusketak, ikastaroak, bilerak eta era guztietako jarduerak egin dira urtero, ehun bat elkarte kultural, sozial, enpresarial eta sindikalek bultzatuta. Halaber, kulturaren, unibertsitate-munduaren, politikaren eta kirolaren pertsonalitate nabarmenak ere hartu ditu, eta Euskadiko elkargune eta hausnarketarako gune nagusietako bat bihurtu da.

Zifrek ekipamenduak lortu duen dimentsioa islatzen dute: bederatzi milioi bisita inguru bere zerbitzu eta espazio guztien artean, 105.000 erabilera baino gehiago bilera-areto eta ikastaroetan, eta 1,1 milioi asistentzia baino gehiago Dibujo, Zeramika, Musika eta Kezka Dantza Eskoletara.

Inauguratu eta hogeita hamar urtera, Portaleak 30. urteurrena ospatzen du, kulturarako, euskararako, prestakuntzarako, herritarren parte-hartzerako eta bizikidetzarako espazio gisa bete duen papera aldarrikatuz. Efemeride hau baliagarria izango da, ez bakarrik haren ibilbidea gogoratzeko, baita etorkizunera begiratzeko eta Eibarko erreferente kultural eta sozial nagusietako bat izaten jarraitzeko ere.