Eibarko Liburutegian % 3,36 igo dira erabiltzaileak: ia 113.000 izan dira guztira

Juan San Martin Udal Liburutegiak iazko 2018an 112.906 bisitari izan zituen, alegia, 368 egunean; aurreko urtearekin alderatuta % 3,36-ko igoera. Gainera, irakurketa sustatzeko egiten diren jardueretan 2.439 pertsonak parte hartu zuten (2017an baino % 11,27 gehiago); dena den, pertsona horiek ez dira sartzen bisitarien taldean, jarduerak liburutegiko espaziotik kanpo egiten dira-eta.

Eibarko Liburutegiak argitara emandako datuen arabera, bestalde, 2018an 13.250 bazkide izan zituzten, alegia, Eibarko biztanleriaren % 48. Zentzu horretan, 2018an bazkidetu ziren 565 pertsona horietatik gehienak umeak dira, zeinei txikitatik gustatzen zaien Liburutegira joatea familiekin batera.

Irakurle aktiboen kopurua ere, ia 3.682, areagotu egin zen; zifra horretan sartzen dira Eibarko Liburutegiko karneta egin zutenak eta urtean behin gutxienez mailegu-zerbitzua erabili dutenak.

2018an, 41.043 mailegu egin ziren, 134 egunean, hau da, 2017an baino 1.095. Liburutegiaren helburua kopuru horri eustea da, joera orokorra jaistea baita. Horren haritik, nahiz eta helduen Liburutegia pixka bat jaitsi den, haurren liburutegian 1.314 dokumentu gehiago mailegatu dira 2018an. Igoera horren arrazoiak hauexek izan dira: ‘Bularretik Mintzora’ programa, haurren irakurketa-klubak eta liburuen loteak ikastetxeei mailegatzea.

Liburutegien arteko mailegu kopuruak ere gora egin du. Eibartik beste liburutegi batzuetara bidalitako liburuak 1.668 izan dira, eta beste liburutegi batzuetara eskatutakoak 1.275. Gainera, 878 liburu ekarri ziren Eibarko irakurketa-klubentzat. Eta mailegu digitalei dagokienez, Eibarko 466 erabiltzailek 953 liburu deskargatu zituzten ‘eLiburutegia’ zerbitzutik. Hala, Eibar hamargarren herria da deskarga-kopuruetan.

Halaber, azpimarratzekoa da Eibarko Liburutegiko katalogoarekiko interesa, izan ere, 2018an 9.783 kontsulta egin dira eta webgunean ere interes handiena sortzen duena katalogoa da.  

Gaur egun Juan San Martin Liburutegiaren funtsak 81.505 dokumentu ditu, hau da, 2,95 dokumentu biztanleko; funtsak liburuez gain, DVDak, diskoak eta aldizkariak ditu.  

Juan San Martin Liburutegiak zerbitzua ematen du astelehenetik ostiralera, 9:00etatik 13:30era eta 16:00etatik 20:30era, eta larunbat eta igandeetan 10:00etatik 13:00etara eta 16:00etatik 20:00etara.

Berrikuntzak

Juan San Martin Liburutegiak berrikuntza batzuk jarri ditu martxan 2018an. Batetik, dokumentuen inprimaketa-zerbitzu berria wifi bidez. Orain arte dokumentuak Liburutegian jendearen esku dauden ordenagailuen bidez inprimatzen ziren, baina gaur egun pertsona askok, inprimaketa-zerbitzua erabili ahal izateko, inprimatu beharreko dokumentazioa beren ordenagailu eramangarritik USB edo posta elektroniko batera deskargatu behar izaten du. Zerbitzu berriarekin, beren eramangarritik inprimatu ahalko dute zuzenean.

Bestalde, urte honetara arte, Liburutegiak ez zuen eskaner-zerbitzurik, baina diru-laguntza bati esker eskaner bat lortu ondoren konpondu egin da gabezia hori, eta dokumentuak digitalizatu ahalko dira. Eskanerrari elementu bat gehitu zaio liburu edo aldizkarien zatiak eskaneatzeko, hala, dokumentu digitalizatu bat lortzeko gero paperean inprimatu ahalko dena.