Aurtengo San Juan jaien balorazioan jendearen parte-hartzea, egitarauaren arrakasta eta herritarren erantzukizuna nabarmendu behar dira

Eibarrek agur esan die 2026ko sanjuanei, zeinek herri-a elkarbizitzarako eta ospakizunerako gune handi bihurtu duten beste behin. Ia hilabete batez, programazioak kaleak eta plazak musikaz, kulturaz, kirolez, tradizioz eta familia-jardueraz bete ditu, eta jaietako egun nagusietan parte-hartze jendetsua eta giro bikaina egon da.

Jaietako une azpimarragarrietako bat ekainaren 20an, larunbatean, bizi izan zen. Kultura Sailaren kalkuluen arabera, 10.000 pertsona inguru bildu ziren Untzagako bi plazetan, Leire Martinezen kontzertuan eta  DJen emanaldian. Horrek musika-programazioaren arrakasta erakusten du, eta milaka pertsona erakartzeko duen indarra.

Sanjuan hauetako beste alderdi nabarmenetako bat bertako talentuaren aldeko apustua izan da. Eibarko artistek protagonismoa hartu dute egitarauaren barruan, eta herrian dagoen sormen maila agerian utzi dute. EMEKA raperoak kontzertua eskaini zuen, eta Danel Santiago DJak amaiera musikala eman zion ekainaren 20ko (larunbata) gau handiari, Leire Martinezen emanaldiaren ondoren. Bi artista hauen presentzia izan da edizio honetako indarguneetako bat, eta erakusten du udalak bertako artistei ikusgarritasuna emateko eta haien lana publiko zabalari hurbiltzeko hartutako konpromisoa.

Hala ere, sanjuanetako arrakasta ez da kontzertu handietara mugatu. Aste hauetan zehar, gustu eta adin guztietarako jarduerak antolatu dira. Haurrentzako proposamenek, kirol-jarduerek, kultura-ikuskizunek, dantzaldiek, kontzertuek eta ekitaldi tradizionalek oso erantzun ona izan dute jendearen aldetik. Sokamuturrak, dultzaineroak, danborradak, Soka Dantza, Marmitako Lehiaketa, herriko elkarteek antolatutako ekintzak… Horiek guztiek eta bestelako ekitaldiek berriz ere erakutsi dute tradizioa eta berrikuntza uztartzen dituzten jai hauek oso sustraituta daudela herrian.

Aurtengo sanjuanak eguraldiak baldintzatu ditu bereziki. Ekainaren 23an eta 24an tenperatura altuengatik ezarritako alerta gorriaren aktibazioaren ondorioz, udalak 13:00etatik 20:00etara aurreikusitako programazioaren zati bat egokitu egin behar izan zuen, eta hainbat jarduera bertan behera utzi edo aldatu, herritarren segurtasuna bermatzearren.

Hala ere, jaiak normaltasunez ospatu ziren iluntzeko zortzietatik aurrera eta jai giroa izan zen nagusi. Udalak eskerrak eman nahi dizkie herritarrei bi egun horietan erakutsitako pazientziagatik eta erantzukizunagatik. Jarrera horri esker, normaltasun osoz aplikatu ziren hartutako neurriak, eta ez zen ia gorabeherarik izan.

Jon Iraola Eibarko alkateak jaien balorazio oso positiboa egin du: "Sanjuanak oso arrakastatsuak izan dira. Herritarren erantzuna apartekoa izan da eta, beste behin ere, Eibarrek jaietan ilusioz eta arduraz jokatzen badakiela egiaztatu dugu. Gustu eta adin guztietarako jarduerak izan ditugu, eta parte-hartzea oso handia izan da ia proposamen guztietan".

Iraolak bereziki eskertu nahi izan du programazioa aldatzea beharrezkoa izan zen egunetan herritarrek izandako portaera. "Tenperatura altuek eragindako alerta gorriak erabaki zailak hartzera behartu gintuen, baina beti pertsonen segurtasunean pentsatuz. Eskertu nahi dut eibartarrek erakutsi duten pazientzia eta erantzukizuna, jarrera horri esker oso gorabehera gutxi egon zirelako jaietan".

Alkateak festen antolaketan jardun duten pertsona guztientzat ere esker oneko hitzak izan ditu. "Nire esker ona udal zerbitzuei, elkarteei, koadrillei eta sanjuanak antolatzen lagundu duten pertsona guztiei. Haien lana eta inplikazioa ezinbestekoak dira tamaina honetako jai batzuk aurrera ateratzeko".

Bestalde, Andoni Zabala Kultura zinegotziak programazioaren aniztasuna nabarmendu du. "Ia hilabete batez, kalera eraman dugu kultura; askotariko proposamenak egin ditugu, eta publikoaren erantzuna bikaina izan da. Egiaztatu dugu kontzertu handiak ezin hobeto uztartzen direla familiarteko ikuskizunekin, antzerkiarekin, dantzarekin, bertako musikarekin edo gure elkarte-sareak antolatutako jarduerekin. Oreka hori da sanjuanen ezaugarrietako bat".

Patxi Lejardi Jaietako zinegotziak festa guztietan izandako giroa azpimarratu du: "Parte-hartzea apartekoa izan da lehen egunetik azkenera arte. Kaleak eta plazak jendez beteta ikusi ditugu, herritar guztientzat pentsatutako jaiez gozatzen. Kontzertuek erantzun ikusgarria izan dute, baina ekitaldi tradizionalak ere arrakastatsuak izan dira, hala nola dultzaineroak, sokamuturra edo danborradak. Tradizioaren eta proposamen berrien uztarketa horrek egiten ditu berezi Eibarko sanjuanak".

Egun zailenetan herritarrek erakutsitako konpromisoa ere eskertu nahi izan du Lejardik. "Bagenekien alerta gorriak programazioaren parte bat aldatuko zuela, eta eskerrak eman nahi dizkiet eibartarrei erakutsitako jarreragatik. Lankidetza horri eta antolakuntzan parte hartu duten pertsona guztien lanari esker, jai seguruak eta gorabehera gutxikoak izan ditugu".

2026ko sanjuanak amaituta, udalak edizio honetako ebaluazio-prozesua egin, eta datorren urteko programazioa lantzen hasiko da. Helburua izango da jai parte-hartzaileak, seguruak eta kalitatezkoak finkatzen jarraitzea, tradizioaren, kulturaren eta musika-proposamen handien konbinazioari eutsiz; horri esker, bihurtu direlako sanjuanak berriz ere Eibarko egutegiko gertaera garrantzitsuenetako bat.