Udalak lehiaketa bat antolatu du sare sozialetan, gabonetan herriko txoko gogokoena partekatzeko gonbita eginez

Udalak "Eibarko zure txoko gogokoena Gabonetan” lehiaketa jarri du abian. Ekimen honek Instagram eta Facebook sare sozialetan Gabonetako izpiritua irudikatzen duten herriko tokien argazkiak partekatzera gonbidatzen ditu herritarrak. Lehiaketa 2025eko abenduaren 1ean, 18:00etan, hasiko da eta martxan egongo da 2026ko urtarrilaren 6ra arte.

Ideiaren helburua da herritarrek gehien maite dituzten hiri-espazioei balioa ematea, nortasun kolektiboa indartzea eta mosaiko bisual handi bat sortzea, Eibarrek Gabonak nola bizi dituen erakusteko. Parte-hartzaileek herriko kaleak, plazak, fatxadak, dendak, balkoiak, oinezkoentzako guneak edo edozein txoko esanguratsu erretratatu ahal izango dute, betiere gabon giroan murgilduta.

Ekimen honen bidez, gainera, hiria Gabonetan dinamizatu nahi da, haren merkataritza-, kultura- eta zerbitzu-gaitasuna indartu, eta herritarren parte-hartzea, sormena eta jai-giroaren hedapena bultzatu sare sozialen bidez.

Parte hartzeko, ezinbestekoa izango da argazkia #GABONAKEIBARREN25 traolarekin argitaratzea, Udalaren kontu ofiziala (@eibarkoudala) aipatzea eta Instagramen edo Facebooken profil publiko batetik egitea. Erabiltzaile bakoitzak argazki bakarrarekin lehiatu ahal izango du, edozein gailurekin eta nahi duen estiloan (kolorea, zuri-beltza, iragazkiak, etab.). Aukeran, azalpen labur bat gehitu ahal izango dute, txoko hori zergatik aukeratu duten azaltzeko.

Lehiaketa 18 urtetik gorako pertsona guztientzat zabalik dago, Eibarren bizi edo ez, udal langileak, hautetsiak eta horien lehen mailako odol-ahaidetasun edo ezkontza-ahaidetasunezko senideak izan ezik.

2026ko urtarrilaren 7an, Udalak zozketa egingo du irudi guztien artean, eta irabazlearen izena argitaratuko du profil ofizialetan. Saria saski bat izango da bertako produktuekin, "Coliseoaren laguna 2025" bi txartel eta Erosi Eibarren txartelak; hori guztia 500 eurotik gorako balioa duen lotea.

Parte hartzen duten argazkiek irudi-eskubideak errespetatu eta bizikidetza-arauak bete beharko dituzte: ezingo dute eduki iraingarririk, desegokirik edo hirugarrenen datu pertsonalik jaso. Egileek Udalari lagako dizkiote irudiak beren kanal ofizialetan zabaltzeko eskubideak, betiere merkataritza-helbururik gabe.

Lehiaketaren oinarriak www.eibar.eus webgunean daude eskuragarri. Beste kontsulta batzuk egiteko, interesdunek Idazkaritza Arloarekin (Komunikazioa eta Gardentasuna) harremanetan jar daitezke lehiaketa@eibar.eus helbidearen bidez.