Udalak bigarren eskuko azokaren udako lehen edizioa antolatuko du ekainaren 3rako

Eibarko Udalak bigarren eskuko azoka bat antolatu du, lehen aldiz ekainean egingo dena, Bigarren Eskuko Azokaren lehen edizioa izanez. Era horretan, Udalak herritarrak kontzientziatu nahi ditu, ikusaraziz objektuek bigarren bizitza bat izan dezaketela eta beste pertsona batzuek berrerabil ditzaketela.

Jon Iraola alkatearen hitzetan, “merkatu berri honen bidez, nahi duguna da eibartarrok “Ekonomia Zirkularra” izenekoaren beste kate-begi bat izatea, aukera emanez behar edo nahi ez ditugun objektuak erosteko eta, hala, bigarren bizitza bat eskaintzeko”.

Azoka ekainaren 3an egingo da, eta erabilitako objektuak saltzeko interesa dutenek bi modutara egin ahal izango dute.  Horrela, postu bat (mahai bat) erreserbatu ahal izango da bakoitzak nahi dituen objektu erabiliak saltzeko; edo, bestela, erabilitako objektuak gordailu-zerbitzuan utzi ahal izango dira, gehienez ere 10, pertsona bakoitzeko, eta egoera onean; eta antolakuntzako taldea arduratuko da objektu horiek zaintzeaz eta saltzeaz. Horretarako, saldu nahi diren objektuak larunbatean bertan (ekainak 3) ekarri beharko dira, 9:00etatik 10:00etara bitartean.

Objektu horiek gordailu-zerbitzuan geratuko dira erregistratuta saltzaileak egokitzat jotzen duen prezioarekin, eta salgai jarriko dira.  Kasu horretan, ez da onartuko arroparik, erabilitako osagarririk, ezta tamaina handiko objekturik ere.

Era berean, adierazi behar da, oraingo honetan, eta azoka uda partean egingo denez, lehentasuna emango zaiela urtaro horrekin eta oporrekin zerikusia duten objektuei eta, besteak beste, honako hauek salduko direla: kiroletako, bidaietako eta hondartzarako artikuluak eta liburuak, eta musika- edo zinema-artikuluak.  

Beraz, postuak adjudikatzean, lehentasuna emango zaiei baldintza hori betetzen dutenei.

Azoka ixtean, 14:00etan, saltzaileak bertara itzuliko dira salmentaren dirua edo saldu ez diren artikuluak jasotzera.

Postua jartzeko, ezinbestekoa da aurretik erreserba egitea eta adinez nagusia izatea. Zita 943670249 telefonora deituz edo honako estekan dagoen formularioa betez hartuko da: www.merkabi.eus/eibar. Izena emateko epea maiatzaren 30era arte dago zabalik. Gordailu-zerbitzuaren bidezko salmentaren kasuan, ez da beharrezkoa aldez aurretik izena ematea, nahikoa da objektuak egun berean eramatea 9:00etatik 10:00etara.

Bestalde, haurrentzako tailer bat ere egingo da, material birziklatuekin ziba bat (eibarreraz txiba eta tronpa) egiteko. Tailerra 3 eta 12 urte bitarteko umeentzat izango da, baina 5 urtetik beherakoek heldu batekin egon beharko dute. Hormirudi bat ere egingo da Ingurumenaren Nazioarteko Egunaren inguruan, ekainaren 5ean ospatzen baita.

Tailerra 11:30ean hasi eta 14:00ak aldera amaituko da. Plazak mugatuak izango direnez, bost txanda aukeratuko dira 11:30etik 13:30era bitartean, eta txanda bakoitzak 25 minutu inguruko iraupena izango du.   Txanda Errebalen bertan erreserbatuko da azoka-egunean bertan.

Bigarren eskuko merkatu hau egiteko, Udalak dirulaguntza bat eskatu dio Gipuzkoako Foru Aldundiko Ingurumeneko eta Obra Hidraulikoetako Departamentuari, eta beste dirulaguntza bat ere eskatuko dio Eusko Jaurlaritzako Ekonomiaren Garapen, Iraunkortasun eta Ingurumen Sailari.

Aurreko edizioen emaitza onak

Eibarko Udalak azoka hau ekainean ere egiteko erabakia hartu du, ikusita irailean antolatu ohi diren merkatuen edizioek zer harrera ona izan duten; esaterako, bizikleten bigarren eskuko merkatua irailean, eta Gabonetako merkatua abenduan.

Zehazki, iazko bizikleten bigarren eskuko azokan, 74 pertsonak bizikletak eta beste objektu batzuk laga zituzten (patinak, kaskoak, patineteak eta bizikletak eramateko barrak), eta artikuluen % 49 saldu ziren. Gabonetako bigarren eskuko azokari dagokionez, 28 pertsonak jarri zuten postua, eta 17 pertsonak laga zituzten gauzak gordailu-zerbitzuan, non antolaketa arduratu zen haien salmentaz.