Udalak albiste-buletin elektroniko berri bat argitaratuko du hilero, udal jarduerari buruzko informazio garrantzitsuenarekin

Udalak albiste-buletin elektroniko berri bat argitaratuko du hilero, udal jarduerari buruzko informazio garrantzitsuenarekin.

Artxiboko irudia.

2022/05/30

Newsletter berriak herritarrentzat bereziki interesgarria den informazioa partekatzeko balioko du, hilabete bakoitzeko udal-jarduera eta -zerbitzu nabarmenei buruzkoa. Argitalpen berri hori maiatzetik aurrera banatuko da posta elektronikoz eta harpidetza modalitatean. Argitalpen hau jaso nahi dutenek www.eibar.eus udal webgunearen bidez egin dezakete harpidetza.

Eibarko Udalak, maiatzetik aurrera, hileko albiste-buletin edo newsletter berri bat argitaratuko du, herritarrei hainbat arlotan, hala nola ekonomian, enpleguan, berrikuntzan, obretan, hirigintzan, kulturan, euskaran edo kiroletan, toki-eremuan garatzen diren gai garrantzitsuenen berri emateko.

Buletin berriak hilero www.eibar.eus udal-webgunean argitaratutako albisterik garrantzitsuenak bilduko ditu, ahalik eta zabalkunde handiena egiteko eta ahalik eta herritar gehienengana iristeko.

Hileko buletin berria jaso nahi duten pertsonek horretarako prestatutako harpidetza-orri batean sartu beharko dute beren posta elektronikoa soilik, eta une horretatik aurrera datu-base berri batean sartuko dira, newsletter berria bidaltzeko erabiliko dena.

Ana Telleria Gobernua Zabalik ordezkariaren hitzetan, "Zerbitzu digital berri honi esker, gure hirian gertatzen diren gai garrantzitsuenei buruzko informazioa jaso ahal izango dugu, eta, gainera, gure xede-publikoaren zati handi batengana iritsi ahal izango gara; izan ere, dagoeneko Internet eta teknologia berriak erabiltzen dituzte". Telleriak gaineratu duenez, "Ekintza berri honekin, beste urrats bat ematea lortu dugu, gure udalaren kanpo-komunikazioa errazteko eta informazio hurbilagoa eta kalitatezkoa eskatzen dutenen eskaerak asetzeko, klik bakarrean, beren posta elektronikoan jaso eta kontsulta baitezakete informazio osoa".

Ekintza berri hori 2021-2023 aldirako Komunikazio eta Gardentasun Planaren barruan dago. Plan hori Alkatetzaren 2021eko otsaileko Ebazpenaren bidez onartu zen, eta haren helburua da erakundearen komunikazioa hobetzea, barnean zein kanpoan, eta udal-gardentasuna bultzatzea.

Hil honetan bertan argitaratuko den albiste-buletin berria udalaren webgunean dagoeneko eskuragarri dauden beste harpidetza-zerbitzu batzuei gehituko zaie, hala nola Albisteak, Lan Eskaintzak eta Dirulaguntzak.