Sanjuanetako boxeo-gauean omenaldi hunkigarria egingo zaio Amañako tigreari
Emanaldia Astelena frontoian izango da ekainaren 6an, 22:15ean. Emakumezkoen eta gizonezkoan boxeoa, sanda eta herriko talentuak, emozioz betetako gau batean.
Datorren ostiralean, ekainak 6, Astelena pilotalekuan San Juan jaietako Boxeo Gauaren beste edizio bat egingo da. Boxeo-ikuskizun hau klasiko bat da Eibarko kirol-egutegian eta Euskadiko boxeo-esparruan ibilbide luzeena duen ekitaldietako bat, Ordiziakoarekin batera. Gau-ekitaldia 22:15ean hasiko da; bost borrokaldi egingo dira eta sanda-kopa bat, José Pérez Amañako Tigrearen omenez: ekimen honen ezinbesteko figura eta legatu garrantzitsua utzi zuena.
Ekitaldiak —Eibarko TTATT gimnasioaren eta hango entrenatzaile Montxo Quinaren laguntzarekin antolatu dena— lehen mailako ikuskizuna eskainiko du, maila handiko boxeolari eta borrokalariekin.
Izen nabarmenen artean, Amer Agbalou Quinako ikasle gaztearen debuta aipatu behar da, zeinak bere jaioterrian hasiko duen ringaren gaineko ibilbidea. Gainera, emakumezkoen borroka bat egongo da; horren bidez, emakumezkoen boxeoa ikusarazi nahi da, eta ekitaldiak kirolaren balioekin eta berdintasunarekin duen konpromisoa berretsi.
Halaber, sanda modalitateko Amañako Tigrea 2. Kopa ere jokatuko da. Borroka-diziplina hori oso ikusgarria da, eta Eibarren izango dira finalaurrekoak eta finala. Bertan parte hartuko dute, besteak beste, TTATTeko Ion Lealek eta Yago Dominguezek, Omar Mahmouden (Iruñea) eta Manuel Caroren (Castelló) aurka, hurrenez hurren.
Jon Iraola alkatea: “Emanaldi hau kirol-ekitaldi bat baino gehiago da; gure historiari egindako tributua da, boxeoa tokiko harrotasunaren eta gainditzearen ikur bihurtu zutenei egindako omenaldia. Astelena frontoia berriz ere esfortzuaren eta pasioaren tenplu bat izango da, eta hori Eibarko arimaren parte da”.
Bestalde, Andoni Ameztoy Kirol zinegotziak nabarmendu duenez, "boxeoak tradizio luzea du gure herrian, eta horrelako gau-ekitaldiek bizirik mantendu ez ezik, berriztu ere egiten dute kirol hau belaunaldi berriekin (hala nola Amer Agbalou) eta emakumeen kirolaren aldeko apustu sendoarekin. Ohorea da guretzat ekimen hau babestea”.
Eibarko Udalak eta TTATT gimnasioak gonbit egiten diete herritar guztiei, kirol, esfortzu eta emozioz betetako gau honetaz gozatzera. Hitzordua: ekainaren 6a, 22:15ean, Astelena frontoian.
Sarrerak leihatilan salgai. Aulkian 18 €eta harmailetan 15 €.
