Eibarko Udala

Osakidetzak PCRen baheketa selektiboa egingo die Eibarren 13 eta 40 urte bitarteko herritarrei, azaroaren 9tik 13ra

2020/11/05
Eibar Ospitalea.

Probak Eibarko Ospitalean egingo dira arratsaldeko ordutegian, 15:00etatik 19:00etara, eta helburu nagusia da COVID-19ren hedapena geldiaraztea da.

Eusko Jaurlaritzako Osasun Sailak igorritako mezu batean adierazten denez, datorren astetik aurrera Eibarren baheketa selektiboa egingo da 13 eta 40 urte bitarteko bizilagun guztientzat, COVID-19k kutsa ditzakeen pertsonen bila jarraitzeko eta, horrela, birusaren hedapena geldiarazteko.

Probak Eibarko Ospitalean (Otaola etorbidea) egingo dira, astelehenetik, azaroak 9, ostiralera bitartean, hilak 13, arratsaldeko 15:00etatik 19:00etara.

Osakidetzak herritarrei eskatu die bihar, azaroak 6, 09:00etatik aurrera hitzordua eskatzeko, 943-032644 telefono zenbakira deituta.

Era berean, Osasun Sailak eta Osakidetzak gogorarazi nahi dute, COVID-19rekin bateragarriak diren sintomak izanez gero, hala nola sukarra, eztula, eztarriko mina, arnasa hartzeko zailtasunak edo usaimena galtzea, beren etxeetan isolatu eta beren osasun-zentrora deitu behar dutela.

Eibar, arrisku eremuan

Eibarrek 1.758,06 kutsatze izan ditu 100.000 biztanleko azken 14 egunetan, azken astean 228 positibo eman ostean. Atzo, asteazkena, 41 kasu positibo gehiago atzeman zituzten.

Gainera, gogoratu behar da Eibar Gipuzkoako herri jendetsuenetako bat dela eta 27.400 biztanle baino gehiago dituela.