Erosketa-bonuen kanpainako salmentek 100.000 euro inguruko eragin ekonomikoa izan dute Eibarko merkataritzan, kalkuluen arabera

Eibarko Merkataritza Gune Irekiak (ECCA) sustatutako erosketa-bonuen azken kanpainak arrakasta handia izan du, antolatzaileen aurreikuspen guztiak gainditu baitira. Antolatzaileek merkataritza-sektorearen esker ona adierazi dute, COVID-19tik eratorritako murrizketen ondorioz, une zail hauetan herritarrek emandako laguntzagatik.

Kanpaina hau laguntza eta injekzio ekonomiko handia izan da Eibarko merkataritza-sektorearentzat, batez ere saltoki txikientzat. Izan ere, COVID-19aren pandemiaren eta alarma-egoeraren ondorioz, jarduera asko murriztu da.

Horrela, Eibarko saltoki txikiek, Udalak diruz lagundutako kanpaina honen bidez, jarduerari berriro ekitea lortu dute, beren saltokietan salmenta handiak eginez merkataritzaren murrizketak kendu eta lehen astean. Izan ere, kalkuluen arabera, erosketa-bonuen kanpaina honetako salmentek 100.000 euro inguruko eragin ekonomikoa izan dute Eibarko merkataritzan.

EMGItik onartu dutenez, nahiz eta kanpaina hori aspalditik egiten ari den, oraingo honetan, eta une honetako hainbat faktoreren eraginez, bonuak erosteko eta jasotzeko hainbat arazo izan ziren, eta antolatzaileek barkamena eskatu diete herritarrei. Sortutako arazoak kontuan hartuta, aztertzen ari dira zer aldaketa egin behar diren hurrengo erosketa-bonuen kanpainetarako zerbitzua hobetzeko eta oraingoan sortu diren egoerak saihesteko. Aldaketa horien artean sartuko lirateke bonuen on-line salmenta indartzea edo bonuak erosteko pertsona bakoitzak aurkez ditzakeen NANen kopurua gehiago kontrolatzea.

Era berean, COVID-19a dela-eta, Udalak biztanleei eskatzen die aglomerazioen kasuan distantziak babestu eta mantentzeari buruzko arauak betetzeko.