Ekainaren 6an, Bali eta Ipar zentroek beren 5. urteurrena ospatuko dute kirolari eskainitako jardunaldi berezi batekin

Datorren larunbatean, ekainaren 6an, herriko kirol-bizitzan erabat finkatuta dauden Bali gimnasioaren eta Ipar skate zentroaren bosgarren urteurrena ospatuko da. Horretarako, jardunaldi berezi bat antolatu dute, herritar guztiei irekia, kirola, musika eta bizikidetza uztartuko dituena herriko hainbat puntutan.

Goizean Bali Games lehiaketa izango da protagonista, 10:00etatik 13:00etara, Bali gimnasioan. Urteurreneko jarduera nagusietako bat izango da, eta kirol-proposamenak eta -dinamikak bilduko ditu, erabiltzaileak eta parte-hartzaileak partaidetza-giroan murgil daitezen.

Ondoren, Bali gimnasioan jarraituko du programazioak, non 15:00etan Bali Games sarien banaketa izango den. Ospakizun honetan parte hartu nahi izan duten Eibarko hainbat enpresaren lankidetzari esker jaso ahal izan dira sariak.

Xabi Morenok, Bali gimnasioko sortzaileetako batek, publikoki eskertu nahi izan du babes hori: “Gure esker ona adierazi nahi diegu edizio honetako sari ekonomikoetan lagundu duten enpresa guztiei. Enpresa horien inplikazioak erakusten du, beste behin ere, tokiko enpresa-sareak kirolarekin eta gimnasioan osatu dugun taldea indartzen laguntzen duten ekimenekin duen konpromisoa”.

Programazioak Ipar zentroan jarraituko du, luntx batekin, musikarekin eta jarduera ezberdinekin, bost urteko ibilbide partekatu hau ospatzeko.

Arratsaldean, Ipar izango da berriro ere kirol urbanoaren epizentroa, eta 16:00etatik 17:30era skate eta roller park-a irekiko da. Ondoren, 17:30etik 19:30era, skate- eta roller-erakustaldia egongo da, kirolari eta zaleen parte-hartzearekin.

Xabi Morenok, era berean, herritarrak animatu nahi ditu egunean zehar gerturatu daitezen: “Mundu guztiari zuzendutako ospakizuna da. Jakin-mina duen edonor probak ikustera hurbildu, bost urte hauetan sortu dugun giroa ezagutu eta urteurren hau gurekin konpartitu ahal izatea nahi dugu. Horrez gain, edari postu bat ere izango dugu egunaz gozatu nahi dutenentzat”.

Jardunaldia amaitzeko, herritarrei irekitako poteoa egingo da erdigunean, eta bi proiektuetako parte-hartzaile, kolaboratzaile eta pertsonen arteko ospakizun-afaria egingo da.

Eibarko alkate Jon Iraolak bost urte hauetako ibilbide honen balioa azpimarratu du eta kirol-zentro biak zoriondu nahi izan ditu: “Bali eta Ipar zentroak Euskal Herriko kirol- eta gizarte-bizitzari ekarpen handia egin dioten bi proiektu dira, dagoeneko herrian finkatuta daudenak. Familia bat sortzen, ohitura osasungarriak sustatzen eta adin guztietarako topaguneak sortzen jakin dute”.

Bestalde, Kiroletako zinegotzi Andoni Ameztoyk kirol urbanoak herriari egiten dion ekarpena nabarmendu du: “Bali eta Iparren hazkundeak erakusten du zeinen garrantzitsua den kirol-diziplina berrien eta espazio ireki, dinamiko eta parte-hartzaileen alde egitea. Urteurren hau lan kolektibo horren guztiaren aitortza da”.