Eibarren "Ongizatearen plaza" inauguratu da, ongizate integrala eta herritarren parte-hartzea bultzatzeko gunea

Eider Mendoza Larrañaga diputatu orokorrak, Jon Iraola Eibarko alkatearekin batera, ‘Ongizatearen Plaza’ ekimena ireki du gaur goizean Errebal plazan. Foru Aldundiak antolatutako espazio ireki eta berritzaile bat da, non gaur eta bihar hainbat gairi buruz hitz egingo den: nahi gabeko bakardadea, ariketa fisikoa, gaixotasun mentalak dituzten pertsonen inklusioa, gazteen osasun emozionala, teknoadikzioak, elikadura jasangarriaria eta berdintasuna, besteak beste.

"Ongizate integralaren inguruan hitz egiteko eta hausnarketak partekatzeko gune irekia da", azaldu du diputatu nagusiak, zeinarentzat "pertsona guztien ongizate integrala”  “komunitate eta lurralde gisa plazaren erdigunean jartzen jakin behar dugun lehentasuna" baita. “Horretan ari gara Gipuzkoan”, gehitu du. Izan ere, gogorarazi duenez, herritarren eta lurraldearen egoera ekonomikoa oro har “ona” bada ere, gure gizartean gero eta ohikoagoak dira pertsonei eragiten dieten “errealitate eta arazo sozial berriak”, “gaixotasun mentalak, nahi gabeko bakardadea, adikzio berriak, pobreziaren kronifikazioa, etab.”.

Horregatik guztiagatik, proiektu honen bidez "ongizate integralerako plaza bat eskaini" nahi da; izan ere, Mendozak azpimarratu duenez, Gipuzkoako udalerri eta auzoetan plazak "komunitatearen elkargune bat dira, hitz egiteko, elkarrekin egoteko eta ospatzeko".  "Ekimen honen bidez, hain zuzen ere, ongizateari buruz hitz egin nahi dugu, eta modu parte-hartzaile eta ludikoan partekatu, eguneroko bizitzan eta komunitate-bizitzan urrats berriak emateko bideak", zehaztu du.

Diputatu nagusiak Eibarko bizilagunak animatu ditu Errebalgo ‘plazara’ joan daitezen eta bertan parte har dezaten. “Ondo egoteaz gain, gipuzkoarrak ondo sentitzea nahi dugu. Pertsona guztien ongizate integrala sustatu nahi dugu, horixe baita Foru Aldundiaren lehentasun nagusia”, esan du Mendozak.

Eibarko alkate Jon Iraolak adierazi duenez, “Ongizatearen Plaza "ekimenak gonbidatu egiten gaitu tarte batez gelditzera eta gure egunerokotasunaren parte diren hainbat konturi arreta ematera; izan ere, gai horiei buruz ez dugu beti hitz egiten merezi duten denborarekin eta lasaitasunarekin".

Halaber, ekimenaren eszenatokiaren (Errebalgo plazaren) balio sinbolikoa nabarmendu du: “Errebal espazio bizi eta gertuko bat da, oso lotua dagoena gure herriaren identitateari. Hausnarketarako eta topaketarako gune hau hemen hartzeak indartu egiten du toki honen funtzioa pertsona guztientzako leku ireki eta irisgarri gisa ".

Azkenik, Iraolak jardueretan parte hartzera animatu ditu herritarrak, eta eskerrak eman dizkio Aldundiari Eibarren aldeko apustuagatik: "Hiri gisa entzuteko, partekatzeko eta aurrera egiten jarraitzeko aukera bat da, pertsonak eta haien ongizatea gure lehentasunen erdigunean jarriz".

 ‘Adinberri’ abiapuntua

Gaur goizean, Ongizate Plaza ekimena goizeko 10:00etan abiatu da, Iñigo Vicens prestatzaile fisikoaren eskutik. Vicens Adinberri telebista-programaren dinamizatzailea da, eta adinekoei zuzendutako ariketa fisikoari eta elikadurari buruzko saio bat egingo du Errebalen. Espazio berean, Naia Rosek estimulazio kognitiboko saioa egingo du, eta Raquel Rodriguez mindfulness adituak ere hartuko du parte. 11:30ean, nahi gabeko bakardadearen gaia landuko da, Ados Teatroa antzerki-konpainiak ekoiztutako film laburren bidez. Ondoren, solasaldi bat egongo da J.A. Vitoriaren (Ados Teatroa) eta Untzagako jubilatuen artean.

Arratsaldean,17:00etatik 18.00etara, Whu Not Fundazioak zuzeneko podcast bat grabatuko du osasun mentalaren inguruan. Desgaitasun intelektuala eta gaitz mentalak dituzten herritarrekin hitz egingo dute, eta besteak beste, Eibar Genuine taldeko kideekin. Jarraian, gizonen eta emakumeen arteko berdintasunaz eta emakume ahaldunduek Eibarko garapenean izan duten paperaz solastuko dira Arrate Berasaluze langile eta aktibista feminista historikoa, Eibar San Adres egoitzako zuzendari Mariam Ourdi El Alaoui, EITBko kirol kazetari Ana Ramos, Maite Aperribay ekintzailea eta Eibar Clubeko presidente Amaia Gorostiza.

Ostiralean, gazteen ongizatea izango da gai nagusia; izan ere, 10:00etatik aurrera, Armeria Eskolarekin batera antolatutako saio bat egingo da, non, besteak beste, sare sozialekiko adikzioa, gaitasun sozialen galera edo suizidioa jorratuko diren, gazteen eztabaidaren eta lekukotzaren bidez. 11:30ean, Jakoba Errekondo agroekologian adituaren txanda izango da. Debabarreneko bi baserritarrekin batera —Nagore Martin Egotza baserrikoa eta Ander Urkia Amazabalegikoa—, elikadura jasangarriaren garrantziaz hitz egingo du. 

Arratsaldean, 18:00etan, Altxa Burua elkarteak programa dinamiko bat egingo du, mugikorren eta teknologia digitalen erabilera arduratsua eta osasungarria bultzatzeko. Gurasoei zuzendutako saio bat izango da. Azkenik, Ongizatearen Plazari amaiera emateko, 19:00etatik 19:30era, Kantu Jiraren saio berezia egingo da, eta ondoren pintxo-potea. 

Programa eta ordutegia:
https://plaza.gipuzkoa.eus/es/plaza-zure-herrian/eibar