Eibarren egin dira Etxebizitzaren aldeko Itun Sozialaren jarraipena eta Hirigintza eta Etxebizitza Foroaren hirugarren osoko bilkura
Coliseoak erakundeetako ordezkariak eta sektoreko eragileak bildu ditu, birgaitzean, hiri-berroneratzean eta etorkizuneko Lurzoruaren Legearen erronketan oinarritutako jardunaldi batean. Jon Iraola alkateak Eusko Jaurlaritzarekin izandako lankidetza nabarmendu, eta azpimarratu du etxebizitza eskuratzeko aukera bermatzea “datorren hamarkadarako hiri gisa dugun erronka estrategikorik garrantzitsuena” dela
Eibarko Coliseo antzokian egin dira astelehen honetan Etxebizitzaren Aldeko Itun Sozialaren jarraipen-saioa eta Euskadiko Hirigintza eta Etxebizitza Foroaren hirugarren osoko bilkura. Eusko Jaurlaritzako Etxebizitza eta Hiri Agenda Sailak bultzatutako lan-jardunaldi honetan, erakundeetako ordezkariak, teknikariak eta hirigintzaren eta etxebizitzaren alorreko eragileak bildu dira.
Topaketan parte hartu dute Denis Itxaso Eusko Jaurlaritzako Etxebizitza eta Hiri Agendako sailburuak, Miguel de los Toyos Eibarko alkate ohi eta Etxebizitza sailburuordeak, bai eta Eusko Jaurlaritzako Etxebizitza zuzendariak ere, hainbat administrazio eta erakundetako ordezkariekin batera. Saioan, Etxebizitzaren aldeko Itun Sozialaren aurrerapen nagusiak eta Euskadiko etxebizitza-politika publikoen orainarekin eta etorkizunarekin lotutako zenbait gai estrategiko aztertu dira.
Landutako gaien artean, honako hauek azpimarratu behar dira: bizitegi-parkea birgaitzeari, berroneratzeari eta mantentzeari buruzko gomendio-txostenaren emaitzen aurkezpena; Foroaren barruan lantaldeen proposamen berrien azalpena eta bozketa; eta etorkizuneko Lurzoruaren Legearen diseinua markatuko duten gakoetako batzuen azterketa.
Horrekin batera, Etxebizitzaren aldeko Itun Sozialaren ibilbide-orrian jasotako helburu nagusietako batzuk berrikusi dira jardunaldian. Horien artean, alokairu babestuaren parkea handitzea Euskadin. Alegia, 2021ean 26.432 etxebizitza erregistratzetik 2036an 50.432 izatera pasatzea aurreikusten da, 2026an 33.750 eta 2031n 41.400 tarteko mugarriekin.
Halaber, etxebizitza babestuen guztizko parkearen hazkundea aurreikusten da: 2021ean 74.549 etxebizitza izatetik 2036an 116.549 izatera pasatzea da helburua. Era berean, lehendik dagoen bizitegi-parkearen birgaitzea bultzatu nahi da: 2032-2036 aldian 138.000 etxebizitza birgaitu nahi dira, 2022tik 2026ra bitartean 96.000 etxebizitza eta 2027tik 2031ra 116.000.
Helburu horiek lehentasunezko lau jarduera-ildo nagusiren inguruan egituratzen dira: inbertsio handiagoa egitea pizgarri fiskaletan oinarritua; sakontzen jarraitzea etxebizitza-politikaren dimentsio sozialean; etxebizitza udal-agenda estrategikoaren barruan sartzea; eta eraikuntza-sektore erakargarria, lehiakorra eta berritzailea osatzea. Jardunaldian nabarmendu da lau lehentasun horiek markatu behar dutela erakundeen arteko ibilbide-orri partekatua, Euskadiko etxebizitzaren erronkari erantzun integrala emango bazaio.
Irekiera instituzionala Jon Iraola Eibarko alkateak egin du. Eusko Jaurlaritzari eskerrak eman dizkio topaketa hau egiteko Eibarko hiria aukeratzeagatik, eta parte hartu duten pertsona eta erakunde guztien inplikazioa nabarmendu du.
“Etxebizitza eskuratzea da, seguruenik, datorren hamarkadarako hiri gisa dugun erronka estrategikorik garrantzitsuena”, adierazi du Iraolak. “Erabaki tekniko bakoitzaren atzean bizi-proiektu zehatzak daude: egonkortasuna bilatzen duten familiak, beren etxean autonomiaz bizitzen jarraitu nahi duten adinekoak edo emantzipatu eta Eibarren geratu nahi duten gazteak”.
Alkateak bi gai nabarmendu ditu bereziki: gazteek etxebizitza eskuratzeko dituzten zailtasunak eta instituzioetatik erantzun eraginkorrak emateko beharra. “Hiri bat nahi dugu, non gure gazteek bizi nahiko duten, familiak sustraituko diren, beren bizi-proiektua lasaitasunez garatuko duten, eta herri-sentimendua egonkortasunetik eta bizi-kalitatetik indartzen jarraituko dugun”, adierazi du.
Bere hitzaldian, Iraolak Eibarko Udalaren eta Eusko Jaurlaritzako Etxebizitza eta Hiri Agenda Sailaren arteko lankidetza instituzionala ere nabarmendu du, esparru horretan aurrera egiteko funtsezko elementua dela adieraziz.
“Administrazioen lankidetzan jarduten dugunean, ikuspegia partekatzen dugunean, eta zorroztasunez lan egiten dugunean, emaitzak iristen dira Ez naiz mirariez ari; jendearen beharrekin lerrokatutako borondate politikoaz ari naiz, bilera eraginkorrez eta errealitate bihurtzen diren espedienteez”, adierazi du.
Zentzu horretan, alkateak Denis Itxaso sailburuaren konpromisoa eta Miguel de los Toyos sailburuordearen lana eskertu ditu, gertuko elkarrizketa eta estrategia partekatua izatearen garrantzia azpimarratuz.
“Eibarren asko estimatzen dugu harreman hurbil eta konfiantzazko hori. Politika eraginkorrak lor dezakeenaren adibide da”, gaineratu du.
Osoko bilkura honek indartu egiten du Eibarko hiriaren zeregina —topagune eta lankidetza instituzionalerako espazio izatea— hurrengo urteetarako erronka sozial handienetako bat izango den gai honen inguruan; betiere helburua izanik erantzun eraginkorrak eraikitzen jarraitzea etxebizitza eskuratzea bermatzeko eta udalerri kohesionatu, bizigarriago eta irisgarriagoetarantz aurrera egiteko.
