Eibarko Udalak TAO sistema bertan behera utziko du, erdialdean ez du oinezkoentzako gunerik jarriko, eta Gurutze Gorriarekin koordinatuko da etxean dauden pertsonei laguntzeko
Eibarko Udala.
Erabaki horiek hartu ditu gaur eguerdian bildu den Bozeramaileen Batzordeak. Neurriak martxan egongo dira osasun-alarmaren egoera konpondu arte.
Eibarko Udaleko Bozeramaileen Batzordeak, gaur eguerdian egindako bileran, hainbat erabaki hartu ditu, COVID-19k sortutako osasun alarmaren aurrean azken egunetan jakinarazitako neurrietara gehitzen direnak.
Lehenik eta behin, Eibarko hainbat gunetan ezarritako TAO sistema bertan behera uztea erabaki da; era berean, Toribio Etxebarria kalea astelehenetik ostiralera 15: 00etatik aurrera oinezkoentzat jartzeari utziko zaio, eta asteburuetan ibilgailuen trafikoari ixten zaizkion hiriguneko kaleak normaltasunez irekita mantenduko dira.
Bestalde, protokolo bat artikulatzen ari dira, adinagatik edo kanpoan gestioak egitea uzten ez dien egoera batean egoteagatik kalera atera ezin diren pertsonak artatu ahal izateko. Ildo horretatik, datozen egunetan, Gurutze Gorriko arduradunekin bilerak egingo ditu Udalak, lan horiek koordinatzeko asmoz, eta kontuan hartuko dira, era berean, azken egunetan Eibarko Udalera iritsi diren boluntarioen eskaintzak.
Neurri horiek indarrean egongo dira joan den larunbatean ezarritako osasun alarma egoera konpondu arte.