Eibarko ondare naturala ezagutzeko ibilbide gidatua egingo da ekainaren 5ean Usartza-Kalamua inguruan

Eibarrek Ingurumenaren Munduko Eguna ospatuko du ekainaren 5ean, Usartza-Kalamua inguruan “Eibarko ondare naturala ezagutzeko ibilbide gidatua” antolatuta.

Eibarko Udaleko Ingurumen Sailak, Eibarko Baso Biziak elkartearekin elkarlanean, Usartza-Kalamua inguruan Eibarko ondare naturala ezagutzeko ibilbidea antolatu du ekainaren 5ean Ingurumenaren Nazioarteko Eguna ospatzeko.

Zailtasun txikiko bide zirkularra da (4,5 km-ko distantzia eta 110 m-ko desnibela). Ibilbidea Usartzako aisialdi-gunean hasiko da, 10:00etan, eta 3 ordu inguruko iraupena izango du. Oinezko ibilbide gidatua da, Usartza-Kalamua ingurutik igarotzen dena. Bertan, animalia- eta landare-espezieak eta udalerriko natura-ondareari buruzko beste gai batzuk ezagutaraziko dira.

Ekimen hau Eskola Agenda 2030ko programan parte hartzen duten ikastetxeek gure ingurune naturala hobeto ezagutarazteko egindako proposamenetatik sortu da.

Gainera, 2018an, Ingurumen Sailak udalerriko Natura Ondarearen Inbentario bat egin zuen, udalaren webgunean eskuragarri dagoena, eta, beraz, ibilbide honek lan horren emaitzak ezagutarazten jarraitzeko eta ingurune naturalaren balioak herritarrei hurbiltzeko balioko du, Eibarko Ingurumen Ekintzako Planean jasotako ekintza-ildoetako batek jasotzen duen bezala.

Parte hartzeko plazak mugatuak direnez, ezinbestekoa da aldez aurretik izena ematea, ekainak 2ra arte, eta onarpenaren baieztapena jasotzea. Izena emateko deitu 943 83 36 41 telefonora, astelehenetik ostiralera, 9:00etatik 18:00etara, eta/edo idatzi arazi@arazi.eus helbidera.